MS-a tel loin Police eng nge an an dawn?

Star Cement MPL13-ah Mizoram Police-in season bul an ṭan ṭha a, mah se round 9-a Chanmari FC laka an chak loh ṭumin R. Malsawmtluanga a inhliam. Zanin dar 7:00 hian Police-in Kanan FC an hmachhawn dawn a, midfielder game fing bik MS-a tel loa khelh dan an zir a ṭul dawn.

Mizoram Police hian match kua aṭangin point 16 an hmu a, table-ah pathumnaah awmin zanina an khingpui tur Kanan FC point hmuh zat (5 pts) let thum aia tam an hmu. Mahse, zaninah Police hi chak chianga dah a rem lo.

A chhan chu, an intawn tawhnaah an inhnehtawk. September 11, Zirtawpni khan Durtlang Stadium-ah Police leh Kanan te hi an inkhel a, 1-1 a inhnehtawkin chak zawk an awm lo. Kanan tan Malsawmtluanga Hrahsel-in hla tak aṭangin goal ropui bik a khung a, Police-in B. Rosangliana (Rosanga Betlu) hmangin siphurh an sut.

Police tan Kanan lakah fimkhur a ṭul dawn a, an intawn hmasak ṭuma goal khungtu Rosanga Betluin mawhphurhna a lak ngam a ṭul dawn. Republic Vengthlang tlangval Rosanga hi tun hnaiah a tla hniam a, khelhna hmun a chang ta meuh lo. Mahse, MS-a inhliam takah chuan a hmunruak hnawhkhat thei tur zinga mi a nih avangin Rosanga hi a pawimawh dawn.

Chutihrualin team anga Police fiahna a ni dawn a, zanin hi semifinal ticket neihna hun ṭha a ni dawn. Malsawmfela leh Lalhmunmawia (Ahmuntea) ten player naupang zawkte khelmual chhungah an ho ṭhat a ṭul ang.

Hriat tel atana ṭha erawh Police ai mahin Kananin chak duhna an nei lian zawk dawn. Table mawngphaha awm mek Kanan hian match hnuhnung berah Dinthar FC hneh lo mah se MPL13 ṭantirh ai khan an ṭha tawh zawk. KFC hian point nga an hmu tawh a, relegation zone chhuahsan turin Police laka point hmuh a pawimawh dawn.