Anfield-ah Liverpool hnaihtu Man City

Attacking football, passing game mawi, team huaisen leh beidawng duh lo inhmachhawn en duh tan Pathianni zan dar 10:00-ah Anfield lam hawi mai tur a ni. 

Premier League hmahruaitu Liverpool-in Manchester City an mikhual dawn a, an intawn hma hauha sawi neuh neuh a tam avangin he inkhel en châkawmna a zual. Liverpool hian table-ah point rukin hma an hruai fal mek a, City hi an lo hneh a nih ngat chuan point kuain an sang fal ang a, league nomawi an hnaih sawt ang. 

Pep Guardiola-a'n thil thleng thei hriain rilru 'game' a khel lawk a, Sadio Mane chu player tluk der chingin tiin a sawi zauh a, Jurgen Klopp leh Mane ten an pai dam thei lo - boruak a 'hot' nghal. 

Rivalry 'thar' 

Premier League-in team inhal, nomawi inchuha inum a lo hmu tawh ṭhin. Kum 1990 chhoa Manchester United leh Newcastle United inum te, Jose Mourinho-a Chelsea-in Arsenal 'Invincibles' lalna ram an rawn pheh thlak te kha hmuhnawm leh ngaihnawm an tling. 

Khawvela coach 'hot' ber pawl Klopp leh Guardiola ten Premier League an luhchilh meuh chuan football khawvelin hmun dang a hawi tawh lo a, Reds leh City te 'Lalna ram' inchuh chu titi ber a ni leh ta. Klopp-a'n 'heavy metal football' hmangin football hmuhnawm a pho chhuak a, Pep-a 'tiki taka' lah Barca hunlai aṭang tawha sawi hat tling khawpa hmuhnawm a ni. 

Pep-a'n a duh ber erawh Champions League a ni a, City tan a la chawi thei lo. Klopp-a'n Premier League a duh ber thung a, a dangtu chu Pep a ni - a hmaa hnawk awm reng hi German coach-in paih bo a duh tawh ang. 

Thil ṭha leh sawisel tur awm lo sawi nan 'perfect' tih ṭawngkam hman a ni a, football khawvela 'perfection' hnaih ber chu Liverpool leh City khel hi niin an sawi ṭhin. City hi season hnih liam ta leh tun season kal mekah Premier League-a pass dik percentage nei sang ber an ni a, Pep-a hnuaia season li an hman mekah season tinin anni aia ball chang hnem club an awm lo!

Liverpool an duai bik lo.  April 2017 hnu khan Anfield-a Premier League match an khelhah an la tlawm miah lo. He team hi an rilru huaisen bik avangin 'Mentality Monsters' tih hiala koh an ni. Season hmasa ṭantir aṭang tawh khan Reds hian si an phurh hmasakna game aṭangin point 26 an hlawh chhuak thei a, Anfield-ah goal khung hmasak avanga sapatal chiam a fuh lo thei. 

English football-ah Sir Alex Ferguson, Sir Kenny Dalglish, Arsene Wenger, Kevin Keegan leh Jose Mourinho ten rilru game an khel nasa ṭhin a, tun hnaia coach inum ber Pep leh Klopp erawhin an ching ve meuh lo. 

Mahse, tun hnaiah Pep-a insum zo loin Mane chu tluk der ching tiin a kap a, hei hi Anfield lamin an en liam mai lo. Klopp-a'n, "Engtinnge an game khelh zawh veleh kan inkhela thil thleng a hriat theih?" tiin Pep chu mahni team aia team dang veiah a puh. 

Mane-a ngawi bik lo, "Ka tlu der ngai lo. Mahse, penalty min pekna tur a nih chuan ka ti mai a ni ang chu," tiin Pep a kap let bawk a, social media lamah club pahnih fans an inbei zui. Guardiola meuhin rilru game a khel a, Klopp meuh a insum zo lo. Chumiin a hrilhfiah chu he inkhel boruak hi a 'hot' dawn tih a ni a, Anfield inkhel a hmuhnawm loh ring suh. 

Pep-a'n, "Liverpool laka inbuatsaihna ṭha ber chu Atalanta laka ṭha taka khelh a ni," tiin a sawi a, an khel ṭha lo. Goalkeeper Ederson chu hliam vanga lakchhuah a ngai a, he thu buatsaih thleng hian a dinhmun a la chiang lo. 

David Silva chuan hliam vangin Atalanta hi a hmachhawn thei lo tawh a, a dinhmun a la chiang bik lo. Ederson leh Silva tel lo hi eng team tan pawh chhiatpui tham a ni a, Liverpool tan rimawi an tling. 

City squad hi Reds aiin an chau tih hriat tel a ṭha. Nilaini zan khan Champions League match an khel a, Italy-ah an zin bawk. Liverpool erawh Thawhlehni zan khan Anfield-ah an inlan a, City hmachhawn turin inpuahchahna hun an nei tam zawk. 

Anfield-ah an inkhelh zui dawn bawk avangin Reds hi dinhmun ṭha zawk tia sawi ngam an ni a, tun ang hun ṭhaah pawh an chak loh chuan Klopp tan sawi tur a vang ang. 

German coach Klopp chuan, "Chak tur chuan stadium chhunga mi tute pawh - 'hot dog' zuar thlengin  an theihna zawng zawng an hlan a ngai," tiin ṭanrual a ṭul thu a sawi.

Season hmasa team pahnih intawnah City hian Anfield-ah point khat an hlawh chhuak a, Etihad Stadium-ah 2-1 in an chak zui. Season tluana league match-a Reds tlawm awmchhun a ni zui a, City laka point nga an hloh hi nomawi an chawi loh chhan a ni. 

Reds hian 2017-18 Champions League quarterfinal aṭangin City an hnawt chhuak thung a, Pep-a mumang ram an tih tawp sak - Klopp-a tan Pep a hnawk tluk zetin Spanish manager tan Klopp a hnawk. Liverpool tan Joel Matip inlan theih a beiseiawm loh tih loh chu harsatna a awm lo a, Klopp-a'n an ṭhat theih dan berin City a lo mikhual dawn e.