Friendly match khel turin ka phur tawh - Apuia

Indian midfielder ṭha ber zinga mi Lalengmawia Ralte (Apuia) chuan friendly match khel tura a phur tawh thu sawi. India team-in zanin hian Panama nen friendly match an khel ang a, hemi zawh hian Brazil leh Uruguay te nen an inhmachhawn leh dawn.

Vaivakawn tlangval Apuia chuan, "Kan tum tur te an ṭha bawk a, a phurawm tawh khawp mai," tiin a sawi a, World Cup-a khel ram-te hmaah an theihna fiahin a awm dawn.

Mohun Bagan midfielder Apuia chuan, "Bul ṭan ve ngei turin thehtawp ka chhuah. Kan coach hian player naupang zawk chher hriam a, inkawp rem dan a zawng niin ka hria a, hei hi nakin zel atan a ṭhat ka ring," tiin Khalid Jamil-a player thlan dan chungchang a sawi.

Luangmual FC, Dinthar FC leh Chanmari FC youth team tana khel tawh Apuia chuan sawi chhunzawmin, "Nikuma ka inhliam vang khan ka duh angin ka la ti hleithei lo deuh a, mahse khel tur chuan ka inpeih tawh tho. Mizo mipuite min lo ṭawngṭai pui a, min lo ṭan zel turin ka sawm a che u," tiin Vanglaini a hrilh.

Apuia hian kum 10 liam ta khan Goa-a neih BRICS U17 Cup-ah Real Madrid forward Vinicius Jr te nen October 2016 khan an inhmachhawn tawh a, tun ṭuma hian Salt Lake Stadium-ah inhmachhawn nawn thei dinhmunah an ding. Zaninah erawh India-in Panama an hmachhawn dawn a, Apuia'n bul a ṭan lo a nih pawhin bench aṭanga lut ngei tura ngaih a ni.