IFA Shield-ah Lianzuala'n hattrick a siam; India coach Khalid Jamil-a'n thutlukna a siam sual!

Nilaini khan IFA Shield-ah Mohun Bagan Super Giant-in Sreenidi Deccan 6-0 in an sawp a, Lallianzuala Chhangte-in hattrick a siam.

Mohun Bagan ground, Kolkata-ah Mariners-in India aiawha khel tura koh Sahal Abdul Samad, Lalengmawia Ralte leh Manvir Singh te tih loh an player neih ṭhat an chhawr a, Lunglei tlangval Lianzuala pawhin hmun pawimawh a chang.

Lianzuala hian Calcutta Football League-ah Mohun Bagan tan khelin Mohammedan SC an hnehna kawngah player pawimawh a ni a, club thar tan nomawi a chawi nghal. IFA Shield-ah Abhishek Suryavanshi hmanga Bagan-in hma an hruai hnuah Lianzuala'n hattrick a siam a, goal hmasa ber hi minute 44-naah khungin second half minute 52-na leh 57-naah a khung leh a, goal hmaah a hriam zia a pholang.

Hun tawp dawn hnaiah substitute Sandeep Malik-a'n a khung belh a, minute 82-naah Bagan player thar Lee Erwin-a'n a khung belh leh bawk. Erwin-a goal khung hi Lianzuala siamsak a ni. Ruah a sur nasat avangin ground diak deuh mah se Mizo tlangval Lianzuala a langsar hle.

Bagan forward Lianzuala chuan, "Pathian hnen aṭanga thilpek a ni. Ṭawngṭainaa ka dil ṭhin chhanna a ni e," tiin a hattrick siam chungchang Vanglaini a hrilh.

Indian forward ṭha ber zinga mi Lianzuala hi Khalid Jamil-a'n tun ṭum international break-ah ko tel lo a, IFA Shield-a a chet dan thlirin Aizawl FC coach hlui hian thutlukna a siam sualah a ngaih theih.

Hemi chungchang hi sawiin Lianzuala chuan, "Pathianin rem a rawn ruat fel mai ang. Ka tel pawhin a ṭha a, ka tel loh pawhin Pathianin ka tan remruatna ṭha zawk a nei a nimai. Tunah chuan ka dam tawh a, koh theih reng ka ni tawh. Eng pawh thleng se, Pathian ropuina tur zel a ni a, lungngaihna tur a awm lo," tiin India tana koh ni lo mah se theihtawp a chhuah zel tur thu a sawi.