Training kan nei ṭha - Valpuia

India chuan tun ṭum international break-ah hian Panama, Brazil leh Uruguay te an hmachhawn dawn. Khalid Jamil-a hote hian September 25, Zirtawpni zan dar 7:30 hian Sree Kanteerava Stadium, Bengaluru-ah Panama an hmachhawn ang a, hemi zawh hian khawvel huap pawha team ṭha Brazil (October 3) leh Uruguay (October 6) te hmachhawn turin Kolkata an pan ang.

Aizawl FC coach hlui Khalid-a'n Mizo player pathum Hmingthanmawia Ralte (Valpuia), Edmund Lalrindika leh Lalengmawia Ralte (Apuia) te an tel. September 14, Thawhṭanni aṭang khan FIFA ranking-a 44-na Panama an hmachhawnna tur hmun Bengaluru-ah training an ṭan tawh.

Mumbai City defender Valpuia chuan, "Training hi chu kan nei ṭha tawk viauin ka hria a, camp chhung hi a rei tawh bawk avangin inkhel tur pawhin player-te kan phur tawh hle. Tun ṭuma friendly match-ah hi chuan hmachhawn turte ram lian an ni a, ka beisei ngam ngai loh team-te an nih hlawm avangin ka phur takzet a ni," tiin Vanglaini a hrilh.

Khelhna chance chungchang sawiin Durtlang tlangval Valpuia chuan, "Ka position bikah hi chuan a hmaa a kohte an che ṭha a, khelhna chance a tam lo khawp mai. Theihtawp ka chhuah a, match thum khelh turah khelhna hun min pe a nih chuan ṭha taka inkhel turin ka inpeih ang," tiin a sawi.

India team inlan hnuhnun ber chu June 9, 2026 kha a ni a, Tajikistan nen inhmachhawnin Mizo zingah bul ṭan pha an awm lo. Bench aṭangin Lallianzuala Chhangte leh Edmund te an lut. Tun ṭumah hian Mohun Bagan forward thar Lianzuala koh tel a ni lo a, Khalid-a thutluknain mak a tih a hlawh hle.