Chanmari FC head coach thar Steven Dias

Chanmari FC chuan Indian Football League baka Mizoram Premier League-a team enkawl turin head coach atan Steven Dias an lalut a, kum 42 mi Dias hi a inkhelh hun laiin 'David Beckham of India' tia sawi ṭhin a ni.

Dias hi AFC Pro Licence coach a ni a, Indian Football League chauh ni loin a licence aṭang chuan Indian Super League thlenga enkawl thei a ni. Chanmari FC a pan hma hian Jamshedpur FC-ah assistant coach hna a chelh tawh a, Odisha FC-ah coach lailawk hna thawkin Ambernath United Atlanta, Maharashtra leh Jamshedpur B te an enkawl tawh bawk.

Tu nge Dias?

Steven Benedic Dias hi December 25, 1983 khan Mumbai, India-ah piang a, Air India aṭanga bul ṭanin Mahindra United-ah hming a chher hle. Mahindra United hi kum 2000 chhoa India rama football inelna sang berah National Football League bakah Durand Cup, Federation Cup leh Indian Super Cup-ah a te a champion bawk.

Mual ding lama khel ṭhin, ke dinglama ball pet thiam Dias hi a ke aṭanga ball chhuak a ṭhat ṭhin avangin 'David Beckham of India' tiin an sawi hial a, Mahindra United-a a khelh lai hian AFC Cup-ah pawh a inlan.

Kum 2004 khan India tan a khel ṭan a, Nehru Cup a khelh hmasak berah kum 2007 khan nomawi a chawi a, Cambodia 6-0 a an hneh ṭumin goal hnih a khung. Ball pet thiam a nih avangin Dias hian corner kick a pet ṭhin a, Lebanon nen 2-2 a an inhnehtawk ṭumin corner kick aṭangin a khung.

AFC Challenge Cup 2008-a India-in nomawi an chawi ṭumin player pawimawh bik a ni a, Sunil Chhetri nena an inthlawp ṭhat avangin a inkhelh hun lai hian India goal nawrna ber a ni. Kum 2011 khan ram tana inkhelh a chawlhsan a, India tan vawi 75 inlan hmanin goal 10 a khung.

CFC-in an mamawh em?

Chanmari FC-in season liam taa MPL leh I Day Football champion puitu Rochhingpuia an kawl reng laiin Dias an lalut a, chhan lian ber nia lang chu coach licence vang a ni. Chanmari fapa rangkachak Chhinga hian AFC B Licence a nei a, IFL enkawl tur hian AFC A Licence tal a ngai. Season liam ta pawh hian CFC hian IFL tan Dipankur Sharma an la.

AIFF-in thuchhuah a siam tawh a, October 30 aṭangin Indian Football League ṭan a ni dawn. IFL ṭan hun MPL13 final khelh hun nen a inang chiah. IFL atan a hranpaa inpuahchah theih a ni tawh lo a, MPL hi IFL atana inpuahchahna atan hman nghal a ṭul.

Chanmari FC thuneituten IFL leh MPL lama result ṭha an duh avangin team enkawltu tur an zawng kual a, foreigner leh Indian coach hrang hrang an buk kual hnuah Indian football hrechiangtu Dias chungah an mit a tlung ta ber.

CFC dinhmun

Chanmari FC-in I Day Football nomawi an hum thei lo a, MPL-ah result an nei ṭha tawk lo. Mizo club zinga IFL club awmchhun an nih avangin nipui bazarah an duh ang player an lalut thei a, heti chung hian MPL13-ah pathumna an ni phak chauh.

Chanmarians hian match riat aṭangin point 15 an hmu a, table chung bera awm Aizawl FC aiin point ngain an hmu tlem zawk. IFL club hian an khingpui apiang an tum tawk zel a, match hnuhnung berah pawh MPL kai thar Ramthar Veng FC 2-1 in an hneh hram.

September 26, Inrinni tlai dar 3:00 hian Chanmari FC-in an chung chiaha awm Mizoram Police nen pahnihna an zawng dawn a, Steven Dias-a'n team a ho hman loh pawhin RG Stadium aṭangin inkhel hi a en tawh tura ngaih a ni.