Kar 3 international break

Ṭum dang zawng aiin tun ṭum international break hi a rei dawn a, kar thum chhung a awh dawn. Chutihrualin chik zawka thil awm dan thlir chuan ruahmanna ṭha tak niin a lang. Ṭum dangah chuan September, October leh November thlaah international break a awm ziah a, thla tinin match hnih a awm ṭhin.

Kuminah erawh September leh October thla international break chu a zawnin an dah kawp nghal a, kar thum chhung ram leh ram inelna a awm dawn avangin club football hmuh tur a awm dawn lo.

October 10, Inrinniah Premier League thlir tur a awm leh chauh dawn a, season bul ṭan ṭha tawk lo club tan insiamremna hun ṭha a awm thei ang. Chutihrualin club lian chinah chuan an player ṭhahnem tak ram tana an fehchhuah dawn avangin duhthusamin inbuatsaihna kalpui theih a ni lo ang.

Tun ṭum international break hi September 21 - October 6, 2026 inkar a ni a, Premier League-ah chuan gameweek 5 leh 6 inkar a ni. November 9-17, 2026 inkarah a awm leh dawn a, EPL gameweek 10 leh 11 inkarah a tla zep dawn. Nakkum March 22-30, 2027 inkarah international break a awm leh dawn a, EPL gameweek 30 leh 31 inkarah a awm ang.