NE Zone Inter State Badminton C'ship; Mizoramin gold 2, silver 4 leh bronze 5 an la

Yonex-Sunrise North East Zone Inter State Badminton Championships 2026 inelna neih zawh takah Mizoramin team event-ah silver leh bronze medal pahnih ve ve an la a, mimal inelnaah gold leh silver pahnih ve ve lain bronze medal pathum an la bawk. Inelna hi September 15-19, 2026 chhung khan JN Sports Complex, Shillong khawpui ah neih a ni.

NE Zone Inter State Badminton C'ship-a che ṭhate hi kum tawp lama National Championship awm turah an tling nghal thei a, Mizoram aṭangin player pakua an tling. Mizoram aṭanga kal player zingah Chanmari West tleirawl H. Lalrinhlui chuan U19 girls doubles leh U19 mixed doubles category-ah te champion ve vein gold medal pahnih a vaw chhuak a, player langsar ber a ni. Rinhlui hi U19 girls doubles-ah Zoramthari Renthlei, Champhai Vengthlang nen an ṭangdun a, U19 mixed doubles-ah Vanlalpekhlua Sailo, Serchhip nen an inkawp bawk.

Mimal inelna dangah Lalrinkimi, Mission Vengin women's singles category-ah silver medal a dawng a, Serchhip rawlthar Malsawmhlua leh Vanlalhruaia Sailo te inkawpin U19 boy's doubles-ah silver medal an la bawk. Anni bakah hian Saitluangpuia Sailo, Ramhlun Venglai (men's singles), Liansangpuii & Zorinkimi, Chaltlang (Women's doubles) leh Lalnunhluni, Mission Veng (U19 girl's singles) ten bronze medal an vaw chhuak bawk.

Team inelna lamah Mizoram team te an vanduai a, beisei ang result an hlawhchhuak lo. Mizoram women's team leh junior girl's team ten final an lut a, Assam team lakah vanduai ve vein, silver medal-ah an lungawi a ṭul. Mizoram men's team-te Assam lakah tho 3-2 in an vanduai a, junior boy's team te pawh semi final-ah chak zo loin, bronze medal an dawng ve ve a ni.