Brighton-in Premier League champion lai an hre lo

Brighton & Hove Albion chuan Old Trafford an luhchhuah hnuah an kum 125 lawm nan Premier League champion lai Arsenal 3-0 in an sawp. Goal lut zat hi i chhiar dik e, 3-0 in Brighton an chak a, Premier League legend Alan Shearer phei chuan Seagulls hi goal ruk emaw goal sariha chak an phu thu a sawi hial zawk.

Amex Stadium-ah Brighton tan Pascal Gross, Charalampos Kostoulas leh Chema Andrés ten goal khat ṭheuh an khung a, Arsenal-in a chhanletna an nei lo. Mikel Arteta hote ropuina ram aṭanga hnuh thlakin an awm a, a tak ramah an chen a ṭul ta.

An kim em?

Brighton lakah Arsenal an zawr hnap a, an kim lo emaw tih mai tur a ni zawk. William Saliba hliam vangin an la chhawr thei lo a, a aiawh tura lakluh Ezri Konsa-a'n bul a ṭan. Hei erawh season bul an ṭan dan hrim hrim a ni a, Arsenal an kim ṭha.

Player chhuanvawr David Raya, Declan Rice, Bukayo Saka, Martin Odegaard bakah player thar Christos Tzolis leh Bruno Guimaraes ten bul an ṭan. Bench-ah Ipswich Town an hneh ṭuma che ropui Max Dowman leh Mikel Merino te an awm thung.

Mualphona chu

Ṭum dang zawng aiin Amex Stadium boruak a nung ṭha a, Manchester United an hneh zawh chiah vang a ni lo. Seagulls hian Man United hi chu tun hnaiah an hneh fo a, stadium a pawl (blue) ṭhat chhan erawh an club kum 125-na an lawm vang a ni. An jersey pawh kum 100 liam taa an jersey hak ang design a ni a, mawi hran lo mah se inkhelh zawhah erawh Arsenal-in an ṭih tawh ang.

Brighton-in Arsenal an hlau bik lo a, tlarhnung aṭangin ball an inpe chhuak ngam a, Arteta hote ngam ang chu Fabian Hürzeler hote hian an ngam ve vek. Minute 31-naah tun season hmang ṭha Pascal Gross a rawn inlar a, box pawn aṭangin goal ṭha bik a khung. Raya demna tur a awm lo.

Arsenal-in first half-ah siphurh sut hun ṭha an nei a, Saka-a'n Odegaard-a hnathawh ṭhat a hmang ṭangkai thei lo. Seagulls lamin an vaw let nghal a, Charalampos Kostoulas-a'n box pawn aṭangin goal kilah kawh zetin a pet lut.

Arsenal ngamtu

Brighton an khel ṭha a, an khawih apiang rangkachakah a chang ta emaw tih mai tur a ni. Minute 57-naah Arsenal thiamna corner kick aṭangin Seagulls-in goal an khung a, vengtu nei lo Chema Andrés-a'n a tauh lut. Arsenal tlarhnung an muthlu.

Seagulls-in Premier League champion an hre lo a, goal venhim tum loin an nawr chhunzawm zel. An vanneih ṭum ni se, penalty an hlawh chhuak ngei ang. Mahse, Gabriel-a'n box chhungah Kostoulas a titlu chungin referee-in penalty a pe lo.

Gunners an insiamrem thei lo a, Kai Havertz pawhin keeper chiah a hmachhawn hnuah goal a khung thei lo. Tlarhma leh tlarhnungah Arsenal-in beisei an pha lo. Brighton-in chance ṭha dang an neih belh a, Matthew O'Riley-a'n chance ṭha a hlah bakah Malick Junior Yalcouye-a'n crossbar a pet per. Raya zarah Arsenal-in goal an chhuah belh lo a, 3-0 in Brighton an chak.

Arsenal tan inzirna

Arsenal boss Mikel Arteta chuan, "Brighton ka lawmpui a, kan khelh danah erawh ka thinur takzet. A tir minute 20-30 chhung khan tihsual ṭhahnem tak kan nei a, khami avang khan kan buai phah. World Cup zawha kan hnathawh ṭha viau mah se vawiin bikah erawh inzir belhna tur kan ngah hle," tiin a sawi.

Spanish manager chuan sawi chhunzawmin, "International break a awm dawn a, kan hun tawn hrehawm tak pai dam nan kan hmang ang. Kan nih tur ang kan pha lo nasa hle a ni," tiin a lungawi lo hle.

Tun ṭum international break hian ni 16 chhung a awh dawn a, Arsenal hi October 10, Inrinniah an inlan leh chauh dawn. FIFA chuan September leh October-a international break awm ṭhin chu hmun khatah a khai khawm a, hei hi club leh ram tan pawha training-na kawnga a ṭha zawk tura ngaih a nih bakah team leh player-te zin vei vahna senso tih tlem nan a ni.