AFC chakna Zozoa hattrick

Star Cement MPL13-ah Aizawl FC-in nimin khan Dinthar FC 4-0 in an sawp a, Laltlanzova'n hattrick a siam bakah K. Vanlalhriatzuala'n goal khat a khung ve bawk. Coach R. Lalruatfela hote hian match riat aṭangin point 20 an hmu a, chhiarkawp dan thlapin semifinal la lut lo mah se match ruk khelh hmabak nei chungin knockout stage lut ngei tura ngaih an ni tawh.

RG Stadium-a inkhelah Dintharin inkhelh ṭantirh lamah rawn rum ṭhaih mah se Aizawl FC insiamrem hnuah team pahnih an inthlau deuh. Minute 11-naah Sawma Tlangte cross chu Zozoa'n a lu hmangin a tauh lut. Second half ṭantirhah Dinthar keeper Zosangliana leh defender-te an che nawi a, goal ruakah Zozoa'n a khung belh.

Hattrick siam turin nghah rei a ngai lo a, minute 56-naah K. Hriata ball pek chu Zozoa'n um lutin keeper a bum hnuah goal ruakah a khung. MPL13-ah Chanmari midfielder Aron Vanlalrinchhana leh Saikhamakawn midfielder K. Lalremmuana ten hattrick an siam tawh a, Zozoa hi hattrick siam thei pathumna a ni.

Khawlailung tlangval K. Hriata'n minute 62-naah cool zetin a khung belh a, hemi hnu hian Aizawl FC-in goal dang khung belhna hun ṭha an ngah. Sawma Tlangte vanneih ṭum a ni lo a, tun inelnaa goal 10 khung tawhtu Zomuansanga pawhin goal a kung lo a, Khawbel tlangval hi minute 66-naah an la chhuak. Inkhel thununtu Aizawl FC 4-0 in an chak.