Tlai dar 3:00-ah MLS vs Police

Star Cement MPL13-ah vawiin tlai dar 3:00 hian Lawngtlai club MLS FC leh Mizoram Police FC te an inkhel dawn. Police hian an intawn hmasak ṭumin 3-0 in hneh mah se intawn vawi hnihnaa chak zawk tur hriatthiam a har thung.

Coach F. Lalrozama kaihhruai MLS FC hian Police an hneh loh hnuah Saikhamakawn leh Dinthar FC te an hneh a, kum zawnin semifinal khelh ngei an tum. Round 7 khelh zawhah Lawngtlai club hi palinaah an awm a, pahnihna Mizoram Police nena an inkarah point thum chiah a awm.

MLS tan Steven Jorge Laltlanchhuaka, Falton N. Beirachakhei leh Laldinsanga ten match hnuhnung pahniha hnehna an chan ṭumin goal an khung a, round hmasa lamah Lalfamkima (FK-a) leh Felix Lalruatsanga ten goal an khung bawk. Midfield-ah K. Lalhmangaihkima a ṭangkai a, tlarhnungah Lalbiakzuala an neih bawk avangin Police laka chak ngei an tum ang.

Chutihrualin Police hi season liam ta aiin an ṭha zawk a, civil player lak luhten squad an tichak ṭha hle. Match hnuhnung bera Aizawl FC an chelh ṭumin midfielder C. Laldinmawia'n freekick aṭangin mawi zetin a khung a, dead ball specialist R. Malsawmtluanga pet loin a pet zawk. Dindina tan goal pawimawh a ni a, inrintawkna a ngah sawt dawn.

Police hi head coach Lalbiaksanga Colney-in mit lama harsatna a nei chungin team a la ho reng a, BS-a thachhangdawltu Toky Zomuanpuia leh Vanlalchhuanga ten hna ṭha tak an thawk. An intawn tawhna thlirin Police dah san a awl a, mah se Rozama hnuaia insiamṭha chho mek MLS hian an hlau bik lo ang.