Arsenal chak tluang lai a tawp

Europa League lama match thum chak tluang tawh Arsenal chuan 100% record an neih an chhawm nung thei ta lo. Unai Emery naute hian hun tawp dawna goal an chhuah vangin Vitoria Guimaraes nen 1-1 in an inhnehtawk.

Nilaini zan inkhelah Arsenal tan Shkodran Mustafi chuan minute 80-naah goal hmahruai a tauh lut chauh a, mualneitu lamin hun pek belh minute 91-naah Bruno Duarte da Silva hmangin si phurh an sut. Brazilian forward Bruno hian mawi zetin bicycle kick hmangin a khung a, Arsenal tlarhnung dem a thiang lo.

Premier League club hian match li khelhah point 10 hmuin group F hmahruaitu an ni a, nizan khan an hnuai chiaha awm Eintracht Frankfurt chuan Standard Liege an hneh a nih chuan match hnih khelh hmabak nei chungin Gunners hi last 32 an inhlangkai dawn tihna a ni.

Xhaka awm lohna 

Arsenal captain a nihna hlihsak hlim Granit Xhaka bakah Pierre-Emerick Aubameyang leh Mesut Ozil te chu Portugal-ah an zin ve lo. Wolves nena inhnehtawk player aṭangin pariat ngawt an siksawi - defender Rob Holding chu captain armband hrentir a ni.

Ruah a sur hnem a, Gunners lamin inkhel thunun mah se a tir lam minute 45 chhung chu goal zawna pet pawh an nei thei chuang lo. Hun tawp hma minute 10 chauh a awm tawh tihah Nicolas Pepe-a freekick pet chu Mustafi-a'n a tauh lut.

Goal an neih hi chak tlang pui theih tura ngaih a ni. Mahse, ni dang ang bawkin Arsenal tlarhnung a nghing - a laiah Holding, Sokratis leh Mustafi te an awm a, mual sirah Ainsley Maitland-Niles leh Kieran Tierney te chu wing back atan chhawr an ni bawk.

Hun tawp hma chiahin Tottenham player hlui Marcus Edwards-a cross chu harsa ang reng takin Duarte chuan si phurh sut nan a lo bin lut a, team pahnihin point khat ve ve in an insem.

Arsenal-in an striker hriam ber Aubameyang an hruai lo a, rinrawl pakhat zawk Alexander Lacazette chu bench lama dah a ni bawk. Tlarhmaah Gabriel Martinelli, Pepe leh Bukayo Saka te an awm. Emirates Stadium-a Vitoria an hneh ṭuma freekick vawi hnih pet luttu Pepe a hlauhawm, Ivory Coast international hian hla deuh tak aṭangin goal ban a pet per dawp a, a vanneih ni a lo. Marcus Edwards chuan Gunners keeper Emiliano Martinez tan hna hautak siamsak ve mah se a khung bik lo.

Spanish midfielder Dani Ceballos chu second half minute 54-naah malpui hliam vangin thlak a ngai a, Real Madrid aṭanga loan hmanga an hawh hi Inrinni zana Leicester City nen an inhmachhawn hunah a inlan 

thei lo ang.

Unai Emery naute hi Inrinni zan dar 11:00 hian Leicester khel turin King Power Stadium-ah an lenglut nghal dawn. Premier League table-ah Foxes hi a chung zawkah an awm mek a, season thara Champions League khelh tum Arsenal tan chak loh a pawi thui thei dawn.

Brendan Rodgers enkawl Leicester erawh inelna dang hmachhawn an nei lo a, tunkar chhung inbuatsaihna hun an neih bakah anmahni muala khel tur an nih avangin inrintawkna an nei sang khawp ang. Arsenal manager Emery chuan, "A chung bera awm chunga tlin kan tum a, tunah chuan kan dinhmun a ṭha tawh. League kan ngaihtuah a hun leh tawh a, point thum hmuh a pawimawhzia hriain theihtawp kan chhuah chhunzawm ang," tiin a sawi.