Dintharin Aizawl FC an chelh thei ang em?

Star Cement MPL13 round 8 chu vawiin aṭangin khelh ṭan a ni dawn. Tlai dar 3:00-ah hmahruaitu Aizawl FC leh Dinthar FC te an inkhel dawn a, an intawn hmasak ṭumin coach R. Lalruatfela hote 3-0 in an chak. Maimawms tan semifinal khel turin AFC laka point khat tal hlawhchhuah a pawimawh ang.

Aizawl FC hi table chung berah awm mah se match hnuhnung pahnihah chak hmel an hmu tawh lo a, Dinthar FC coach Laldampuia leh a hoten AFC chak lohna lai hre chunga game plan an siam thiam a ṭul dawn. Chanmari leh Police ten AFC an hmachhawn ṭumin nawr chiam an tum lo a, tlarhnung an hnawh phui ve ve.

Hetichung hian AFC hian Chanmari leh Police lakah goal an khung ve ve tho a, tun inelnaa goal 10 khung tawhtu Zomuansanga an dang thei lo. Dintharin Khawbel tlangval Zomuana dan a tum dawn a, chutihrualin AFC laka point hlawh chhuaktute hian goal an khung tih an hriat a ṭha bawk.

Dampuia hoten counter attack hmangin nawr let an tum dawn a, Aizawl FC lam tan game plan pakhat chiah neih a him dawn lo. Coach R-a hoten tlarhnung aṭanga in pass chhuah an thiam a, mah se an khingpuite an chhuah duh loin a talbuai. Dinthar lakah Aizawl FC attacking fiahin a awm dawn.