Mizoram Police-in Aizawl FC an chelh

Star Cement MPL13-ah Aizawl FC-in match hnuhnung pahnihah point li an hloh a, table chung berah awm chhunzawm mah se season khata point hmu tam ber record an siam thei tawh lo. Nimin tlai inkhelah hian AFC-in Zomuansanga hmangin goal khung hmasa mah se Mizoram Police-in C. Zodinmawia (Dindina) freekick hmangin siphurh an sut a, 1-1 in inkhelh a tawp.

Aizawl FC hian point 17 an hmu a, Mizoram Police-in point 13 hmuin pahnihnaah an awm. Club ṭha pahnih hian tun season chak loh an nei lo a, semifinal khel turin kawng dik an zawh. Coach R. Lalruatfela hote hian September 18, Zirtawpni tlai dar 3:00-ah Dinthar FC an hmachhawn ang a, Police hian September 19, Inrinni tlai dar 3:00-ah Lawngtlai club MLS FC an hmachhawn thung ang.

Ruahmanna ṭha

Aizawl FC-in MPL13 an thunun a, Police hma club paruk an hmachhawnah ball an chang tam a, goal an khung tam a, goal an chhuah tlem. Mizoram Police lamin an khingpui Aizawl FC an hrechiang a, ball chan tlem an pawi sa lo.

Coach R-a hoten ball chang tam mah se tlarhnung lamah Police an inhnawh tam avangin hmun hlauhawm lai an thleng pha meuh lo. Chutihrualin chance ṭha nei hmasa zawk erawh Police an ni a, AFC goalkeeper RS Lallawmzuala'n B. Lalrosanga khung tur a dang ṭha hle.

Police tlarhnung lamin Sawma Tlangte dan harsat mah se goalkeeper F. Lalmuanawma a che ṭhat avangin Aizawl FC-in goal an khung thei lo.

Zomuana leh Dindina

Second half-ah pawh Aizawl FC bawkin ball an chang tam a, an goal bawh nat rah an seng. Police defender Vanlalpeka Pautu lakah Laldanmawia'n penalty a hlawh chhuak a, mah se Zomuana penalty chu Muanawma'n ṭha takin dang.

Khawbel goal machine erawh dan reng theih a ni lo a, Stephen Lalrinfela throw in na tak chu ni Zomuana'n mawi zetin minute 56-naah a tauh lut. AFC striker hian tun inelnaah goal 10 a khung tling der. Goal ṭha tak ni mah se ni in a chhun khalh avangin keeper Muanawma'n a tih tur a ti lo.

Goal an chhuah hnuah Police-in goal khung tumin an nawr ve ṭan a, Aizawl FC tlarhnung ṭhiah harsat mah se goal khung nan freekick an hmang ṭangkai. Police midfielder Dindina'n yard 30 vel aṭangin minute 69-naah goal kilah tak a pet lut a, AFC keeper RS Lallawmzuala tan pawh dah ngaihna a awm lo.

Aizawl FC-in minute 20 chhung chak ngei tumin an nawr a, goal hmuh tur erawh a awm tawh lo. Police game plan a hlawhtling a, 1-1 in inkhel a tawp. Inkhelh banah AFC coach R. Lalruatfela'n referee lakah a lungawi lohna a hriattir a, red card a hmuh phah.