Dinthar lakah MLS an 'comeback'

Star Cement MPL13-ah MLS-in nimin khan Dinthar FC 2-1 in an lehthal a, inkhel dangah result eng pawh thleng se phase 1-ah palina chinah an awm dawn tih a chiang. Lawngtlai club hian season liam ta khan MPL semifinal an khel tawh a, tun season-ah knokcout stage an khel leh a nih pawhin thil mak a ni dawn lo.

RG Stadium-a inkhelah MPL champion hmasa ber Dinthar FC-in K. Lalhminghluta hmangin hma hruai mah se F. Lalrozama hoten Laldinsanga leh Falton N. Beirachakhei te hmangin an chhanglet. MLS hian point thum hlu tak an hlawhchhuah avangin table-ah pathumnaah an awm.

Inngam tawk

Dinthar leh MLS te intiat tawka ngaih an ni a, beisei lawk ang ngeiin khelmual chhungah pawh an intluk tawk hle. Chance ṭha an inneih chhawk a, Dinthar right back Laltluangliana cross ṭha chu Silvana R. Lalruatkima'n goal zawnah a tauh thei lo.

MLS forward Rothangpuia pawhin Dinthar keeper J. Lalchhuanliana tauh hman loin a goal lamah a tauh a, goal tura ngaih a nih hnuah goal pawnah chiah ball a kal. Lawngtlai club-in chance ṭha dang an nei a, goalline aṭangin Dinthar midfielder Lalbiakzuala'n a dang.

Minute 29-naah Dinthar an vannei a, K. Lalhminghluta ball tauh chu na tawk lo mah se goalkeeper Vanlalthlamuanpuia'n man pialin goal-ah a lut. Maimawms-in hma an hruai a, goal hian inkhel a tih nun phah bawk.

Comeback chu

Lawngtlaiin na takin an nawr zui a, goalkeeper Chhuanliana leh captain Lalnunzira zarah Dinthar an him hram. Mahse, minute 29-naa Laldinsanga goal khung erawh dan rual a ni lo. Dinsanga hian yard 25 vel aṭangin kawh zetin goal kilah a pet lut.

Second half-ah Dinthar goal bawh a na a, mah se chance ṭha an hlah. MLS erawhin minute 63-naah Falton N. Beirachakhei hmangin an khung. Yard 20 vel aṭangin Falton hian mawi zetin a khung. Dinthar tan substitute Ricky Lalramnghaka'n freekick aṭangin ṭha zetin a pet a, keeper Thlamuanpuia'n a dang. Maimawms-in nawr chhunzawm mah se Lawngtlai club an ṭang tluan a, 2-1 in an chak hram.