Mizoram Swimming thawnthu thar ziaktu Lapuii & Puii

Tui hleuh hmanga inelna, 22nd National Masters Championship 2026-ah Mizoram chuan thawnthu thar an ziak a, national level inelnaa a vawi khat nan medal an la - bronze medal pathum an hlawh chhuak!

Mizoram aiawha fehchhuak Dr. Vanlalṭanpuii (Lapuii) chuan bronze medal pahnih a la a, Lalrinpuii Fanai chuan bronze medal pakhat a la ve bawk - Mizoram infiamna chanchinah hriatreng a ni tawh dawn.

Swimming Federation of India buatsaih inelna hi September 11 khan neih ṭan niin, niminah khar a ni a, Aquatics Association of Mizoram chuan Mizoram aiawh turin tui hleuh thiam mi pali a tir - Lapuii leh Puii bakah hian Lalrindika leh Lalruatfeli ten inelna an hmachhawn.

Bahadurgarh, Haryana-ah inelna hi neih niin, Chaltlang Venglai nu Lapuii hi kum 50-54 category ah a inlan a - 50m & 200m breaststroke-ah te bronze medal a la. 50m-ah hian 1:06.42-ah a thleng a, 200m-ah hian 5:12.33 hun a hmang.

Chawnpui nula Lalrinpuii chu kum 25-29 inkar inelnaah tel ve bawkin, 200m breaststroke-ah a inlan a, 4:15.75-ah thlengin, bronze medal tho a hlawh chhuak - tun inelna hi October-a neih tur Asian Masters Swimming Championship-a India aiawh tur thlanna a nih nghal avangin ngaihhlut a hlawh a, tel pawh an tam hle.

Dr. Lapuii leh Puii te hian bronze medal an lak avangin India aiawh tura thlan an ni nghal a, Lalrindika'n medal hlawh chhuak ta chiah lo mah se, India aiawh tur hian thlan a ni ve bawk - Chanmari tlangval hi 50m & 100m Freestyle-ah a tel a, 100m Freestyle-ah hian palina niin, second khatin bronze latu a phak lo.

Mizo swimmer-ten Mizoram history an siam a, Mizoram swimming tan chuan chanchin lawmawm a tling - Mizoram tana medal hmasa ber lak a ni a, hei hi a bul ṭanna chauh a nih an beisei ang.