Chanmari FC chak zawh lohna chhan Zomuana

Star Cement MPL13-ah champion lai Chanmari FC leh hmahruai mektu Aizawl FC te Inrinni chhun khan 2-2 in an inhnehtawk. Durtlang Football Stadium-a inkhelah Chanmariin Suanngaihmuana leh Aron Vanlalrinchhana te goal hmangin khung hmasa mah se Aizawl FC-in Zomuansanga an nei a, Khawbel goal machine hian goal hnih khungin chak zawk an awmlo.

Aizawl FC-in point 16 an hmu a, hmahruaitu niin Mizoram Police nen chak loh an la nei lo. Club pahnihte hi September 16, Nilaini tlaiah an inkhel dawn. Chanmari erawhin match ruk aṭangin point kua chauh an hmu a, palinaah an awm thung. Rochhingpuia hote hian Nilaini zan dar 7:00-ah Saikhamakawn an hmachhawn ang.

Chhinga game plan

MPL13-ah Chanmari che ṭha tawk lo mah se Rochhingpuia leh hote hian Aizawl FC an hlau bik lo. Inrinni inkhelah pawh Chhinga'n game plan fel tak a nei a, an khelh danah an chiang. Aizawl FC lamin ball an chang tam a, Chanmariin tum nei chungin goal venhim hna an thawk.

Minute 31-naah Chanmariin tlarhnung aṭangin ball an inpe chhuak a, mawi zeta Aizawl FC tlarhnung ṭhiat pheiin vei lam aṭanga F. Malsawmtluanga cross chu Suanngaihmuana'n goal-ah a chantir. Second half-ah pawh Chanmari thoin bul an ṭan ṭha a, box pawn aṭangin Aron Vanlalrinchhana'n mawi zetin freekick a pet lut. Aizawl FC-in Chanmari lakah goal hnih an chhuah a, round hmasa pangaa an goal chhuah zat nen a inang chiah.

Khawbel goal machine

MPL chanchina season khata khung tam ber Zomuana telna Aizawl FC-in tlawm mai an tum lo a, an hmelma Chanmari FC lakah tlawm an tum lo lehzual. Coach R. Lalruatfela hoten an theihna an rawn lantir a, minute 68-naah ding lam aṭanga Laldanmawia cross duhthusam chu Zomuana'n a tauh lut.

Minute 90 chhungin Aizawl FC-in siphurh sut hman lo mah se injury time-ah vei lam aṭanga Stephen Lalrinfela cross chu Zomuana'n a tlawh goal. Match ruk lekah Zomuana'n goal kua a khung a, season liam taa a khung chanve a khung der. Aizawl FC tan result ṭha ni lo mah se 2-0 a hnufual hnua 2-2 a nih avangin result ṭha a ni.

Chanmari tan result ṭha ni lo mah se Aizawl FC laka an khelh danah an lawm tho ang. An player thar lakluh Lalliansanga leh R. Ramdinthara te an inlan a, season tawp lama an ṭhat dan taka an khel chhuak thei a nih chuan Aizawl FC ai pawhin champion turin an buk a rit zawk ang.