Real-in Courtois thlun ngheh tum

Thibaut Courtois chu a khelh mekna Real Madrid chuan thlun ngheh an tum a, Belgian keeper hian contract thar a ziak a, a hmang tluan an nih chuan Real-ah season 10 chhung a khel tling dawn.

Kum 34 mi Courtois hian Santiago Bernabeu-ah tun season bak contract a nei tawh lo a, Real-in kum upa lam an kawl rei ṭhin loh avangin a chhuah mai ringtu an tam hle.

Mahse Nilaini zan Champions League-a Inter Milan an hneh hnu khan Los Blancos chuan contract thar ziahpui an duh a, Courtois pawhin Real-a châm chhunzawm zel a duh nia sawi a awm.

Courtois hian 2018-a Real a zawm hnuah si ban nghaktu nghet a la ni char char a, club bakah ram tan keeper dangin an nek chhuak zo lo. Champion theihna zawng zawng a champion vek tawh a, a kum tam ve deuh tawh mah se a la chuai lo.

International football la chawlhsan lo mah se club lama insawrbing a duh avangin chawlh a la mek a, hei vang hian Real chuan chhawr chhunzawm an duh phah sawt ang.

Spanish club lian hi anmahni lo enkawl tawhtu Jose Mourinho hnuaiah indinthar an tum mek a, Chelsea-a a pu hlui hnuaiah Courtois pawhin hmun pawimawh a chang chhunzawm.

Season hmasa khan Real-in nomawi chawi loin season an khar a, tun season-ah nil an tum tawh loh avangin Portuguese manager hnuaiah an hmuhnawm nghal hle. Chutihrualin September 4, Zirtawpni zan khan Real Betis an hneh loh avangin an hmelma Barcelona aiin an hniam zawk.

Real hian zanin dar 12:30-ah Rayo Vallecano an mikhual dawn a, hnehna chan an tum a nih chuan goal khungtute tluk zetin Courtois a pawimawh leh dawn. League match-ah a zawna chak loh an duh dawn loh avangin inkhel hmuhnawm a beisei ngam.