Zan nganaah inhnek 12 awm leh dawn

Mizoram Labour Link LPS Pro Fight 2026, zan ngana chu zanin hian LPS Arena Falkland-ah neih chhunzawm a ni leh dawn a, weight hrang hrangah bout 12-in a chhunzawm dawn.

Zaninah flyweight, bantamweight leh lightweight-ah inhnek pathum ṭheuh a awm dawn a, welterweight-ah pahnih awmin middleweight-ah inhnek pakhat a awm dawn bawk.

Middle-a inhnek turah Boyka Lalhriatsanga a inlan dawn a, Vaitin boxer hi Pro Fight-ah a mikhual loh avangin inhnek hmuhnawm tak a beisei ngam ang. Boyka hian John Zonunsanga Royte, Ailawng a hmachhawn dawn.

Zan ngana inhnek turah Seigoulal, Churachandpur Manipur a inlan dawn bawk a, state pawn aṭanga inlan tur awmchhun a ni dawn. Kumin inelnaah Churachandpur boxer pahnih, Thangboi leh Onminlen ten hnehna an lo chan tawh avangin Seigoulal-a'n chak loh bik a duh lo ang.

Pro Fight hi LPS Youtube channel-ah member tan en theih a ni a, member nih man hi Rs 179 chauh a ni. A hmuna en duh tan ticket Rs 50 chawiin a en theih bawk.