Falton-a'n MLS a chakpui

Star Cement MPL13-ah chhum zingin inkhel hmuhnawmna a la kiang zo lo a, Lawngtlai club MLS FC-in Saikhamakawn FC 3-2 in an hneh. Chakna goal hi injury time-ah pawh minute nganaah Falton N. Beirachakhei khung a ni. MLS hian point sarih an hmu a, semifinal khel thei chin palinaah an inhlangkai.

Durtlang Football Stadium-a inkhelah team intiat tawk an inkhel a, ṭan phat aṭangin inkhel a nung nghal. Minute kuana lekah SKK tlarhnung tih ṭhat tawk loh vangin Steven Jorge Laltlanchhuaka'n hmahruaina goal a khung a, minute 40-naah Steven bawk hian box pawn aṭangin goal kilah a pet lut.

Halftime hma chiahin VL Thanga freekick pet chu John Lalrinawma'n ṭha zetin a tauh lut a, SKK-in si phurh an sut ṭhen. Second half-ah MLS lamin an hun ṭha neih an hmang ṭangkai thei lo a, SKK lamin corner kick hmang ṭangkaiin LH Lalchawimawia'n a lu hmangin si phurh sutna goal a khung.

Coach Lalrindika Hmar hoten hnehna chang turin minute 10 chuang hret hun an la nei a, mah se keeper Lalhruaitluanga Kawlni hliam vangin an zawn chhuak. SKK-in substitution pali chiah la siam mah se vawi thum an thlak tawh a, substitution dang an siam thei tawh lo.

SKK kim loin an khel a, defender Samuel H. Lalhlimpuia'n keeper hna a chelh. MLS-in an tamna an hmang ṭangkai a, Falton-a'n chakna goal mawi zetin a khung. Keeper ngai lo Samuel-a dem theih a ni lo.