Arteta-a'n contract thar ziak hnai

Arsenal boss Mikel Arteta chuan London club enkawl chhunzawm turin contract thar a ziak hnai a, inbiakna a kaltluang hle niin khawthlang media-te chuan an tarlang.

Arteta hian Gunners-ah season khat chauh contract a nei tawh a, club thuneituten thlun ngheh ngei an duh. Nipui laiin transfer lama rilru pek an duh avangin coach contract hi an buaipui lo a, tunah erawh he lamah an insawrbing leh ta.

Spanish manager hian thla hmasa lawk khan Arsenal-a a hlim thu lo sawi tawhin, "He club-a cham hi ka duh a, chuvang chuan contract thar ziah hunah kan buai lo. Club pawhin cham ngei turin min duh ve niin ka hria a, kan hahdam hle a ni," a ti.

Premier League-a Arsenal champion puitu Arteta hian Gunners-ah hian kum khatah pound maktaduai 10 a hlawh mek a, Champions League khel phaka season an khar apiangin £5mtd bonus a dawng tel ṭhin bawk.

Contract tharah hian a hlawh hi nasa takin a pung dawn nia sawi a ni a, khawthlang media-ten an tarlan dan chuan kum khatah £20mtd deuhthaw a hlawh dawn niin an sawi.

Kum 44 mi Arteta hnuaiah Arsenal-in hma an sawn a, tun season-ah pawh Community Shield laa season bul ṭanin, league match thum a zawnin an chak a, Champions League an match hmasa berah Napoli (1-0) an hneh bawk.

Gunners hian zanin dar 12:30-ah league match an khelh chhunzawm dawn a, Sunderland chu khualmualah an lenchilh ang.