India U14 tennis champion Hruaitluanga

All India Tennis Association Challenger Series 7 chu khelh zawh a ni ta a, Boys Under-14 inelnaah Zonuam naupang Lalhruaitluanga Sailo a champion.

Murugan Academy Of Tennis, Bengaluru-a neih inelnaah Hruaitluanga hian Tamil Nadu lam mi Aegan Balakumar chu final-ah a hmachhawn a, 6-4, 6-2 a hnehin nomawi a hlawh chhuak.

Karnataka State Lawn Tennis Association buatsaih inelnaah hian Hruaitluanga hi seeded no 3 a ni a, Boys U14-ah hian India-ah no. 128-na a ni mek bawk - May thla khan Guwahati-a neih All India Tennis Association Challenger Series 7 U14-ah tho a lo champion tawh.

Mizoram Tennis Association (MTA) chuan, "Hruaitluanga kan lawmpuiin kan chhuang takzet a, theihtawp chhuaha Mizoram tihmingṭha zel turin duhsakna kan hlan," tiin an lawmpui thu an sawi.

Hruaitluanga hi Rohan Bopanna Tennis Academy, Bengaluru-a tennis zirlai a ni.