August-a khel ṭha ber Pedro

Chelsea forward Joao Pedro chu August thlaa Premier League Player of the Month atan thlan a ni a, kum hnih dawn hnua Blues player, he award dawng leh hmasa ber a nih avangin Chelsea tan chuan he award hi a hlu hle.

September 2024 khan Cole Palmer chuan he award hi dawngin, a hnuah Chelsea player dawng thei an awm leh lawk lo - hei hian season hnih chhunga Blues dinhmun pawh thui takin a hrilhfiah.

A vawi khat nana he award dawngtu Pedro hian August thla chhungin league match thum a khel a, goal hnih khungin, assist vawi hnih a nei.

Brazilian striker hian award dawng tur hian Blues tana a khelhpui Palmer bakah, hming chhawpchhuah ve dang Riccardo Calafiori (Arsenal), Rayan Cherki (Manchester City), Bruno Fernandes (Manchester United), Mamadou Sangare (Brentford), Konstantinos Tzolakis (Hull City) leh Yoane Wissa (Newcastle United) te a khum a ni.

Xabi Alonso hnuaiah Chelsea an indinthar mek a, tun season inelna hrang hranga match nga an khelh tawhah vawi li chakin, vawi khat an tlawm - an league match hnuhnung berah Arsenal chu 2-1 in an ngam lo.

Gunners ngam loh hnuah League Cup third round khel zuiin, Leeds United chu 6-3 in an sawp a, zanin dar 7:30-ah league match khel turin Manchester United hnehtu Hull City an mikhual ang.