Kananin point an hlawh chhuak ve ta

Star Cement MPL13-ah Kanan FC-in point an hlawh chhuak ve ta a, nimin chhun khan kumin inelnaa che ṭha tak Mizoram Police nen 1-1 in an inhnehtawk. Kananin Malsawmtluanga Hrahsel hmangin an khung hmasa a, Police-in na takin nawr mah se B. Lalrosanga'n mawi zeta a tauh luh hnuah goal an khung belh thei tawh lo.

Durtlang Football Stadium-a match thuma goal li khung thei Malsawmfela chu bench-ah a awm a, second half-ah Sawmfela bakah Lalfakzuala te luhtir mah se result erawh a danglam phah lo. Police hi pahnihnaah awm chhunzawm mah se Kanan laka point hnih an hloh avangin an result-ah an lawm lo ang.

Kanan tan erawh result duhawm tak a ni a, MPL-a point hlawh chhuah hrim hrim harsatzia leh hlutzia an hriat an belh ang. KFC hian point khat chauh la hmu mah se an chung lama awm te nen an point a inthlau tam lo a, match thum chet ṭhat a, relegation zone chhuahsan dan theih a ni.