Richarlison-a'n Tottenham khin a tum!

Tottenham Hotspur striker, Premier League squad-a telh loh Richarlison chuan London club chhuahsan dan a ngaihtuah mek a, a contract tihtawp tumin, Spurs hi dan anga khin hial pawh a hnial lo niin an sawi.

Brazilian srtiker hi nipui transfer lai khan Spurs chhuahsan thei dinhmunah a ding a, coach Roberto de Zerbi pawhin, player hian chhuah a duh thu a hrilh niin a sawi.

Richarlison hi a club hlui Everton chuan lak let dan an ngaihtuah a, Spurs nen hian pound maktaduai 35-in an inrem. Mahse, Brazilian striker leh Everton hi mimal thilah an inrem thei lo a, Richarlison a chhuak leh lo.

Turkish club Trabzonspor pawhin Richarlison an ngaihven a, Mohamed Salah khelhna club hian kar khata £270,000 vel hlawhtir an inhuam nia sawi a ni. Mahse, Spurs lamin Turkish club dawrna hi an pawm thei ve leh lo thung!

Trabzonspor hian £15mtd-in an dawr phawt a, hnawl a nih hnuah £20mtd-in an dawr leh a, mahse, Spurs hian an hnar tho. Transfer bazar khar a ni zui a, tun thlengin club thar nei loin Richarlison a awm a, EPL squad-ah a tel chuang bawk si lo.

Kum 29 mi striker hian a contract tihtawp a, man nei loa Spurs chhuahsan dan a ngaihtuah mek a, hei hi London club hian thil theihah an ngaih loh avangin player leh club an inhmu thiam lo mek.

Richarlison hian Spurs-ah tun season chhung atan contract a la nei a, season khat dang pawhsei theihna dan a la awm cheu bawk! Brazilian club, a naupan lai aṭanga a ṭan ṭhin Vasco da Gama chuan Richarlison hi lak luh an duh nia sawi a ni a, amah pawh hian an rama kir a hreh lo.

Vasco-a director of football Admar Lopes chuan Richarlison lak luh tuma Spurs nen an inbiak ngei thu a sawi a, "Lak luhna chance kan nei," a ti - mahse, vawiinah Brazil transfer pawh hi khar a ni dawn a, Richarlison hma hun a chiang lo zel.