Minister hoin New Market sak mek en

September 9, Nilaini zing khan Commerce & Industries, PWD leh UDPA depatrment hotute'n Commerce & Industries minister F Rodingliana hoin Aizawl New Market sak mek an tlawh a, Zion Street aṭanga New Market luhna kawnga tuihâwk luang nasa ṭhin tihziaawm dan tur an en bawk.

Aizawl Bazarpui sak mek ennaah hian Commerce & Industries secretary H Lianzela, PWD engineer-in-chief David Sapzova, UDPA director Jacob Lalawmpuia leh Dawrpui Local Counil member-te an tel.

Rodingliana chuan, New Market building chu ram tana pawimawh, mipuite’n an hman ṭangkai tur a nih avangin a satute chu uluk leh chak taka thawk turin a chah.

Power & Electricity minister ni bawk F Rodingliana ho hian New Market-a sorkar inte châwm tura dah 500kVA transformer pawh en a ni a, electricity smart meter dah dan turte an enfiah a ni.

Zion Street aṭanga Bazarpui luh thlakna kawnga tuihâwk luang nasa lutuk ṭhin tihziaawm dan tur ruahman a ni a; Zion Street aṭanga tuihâwk lut ṭhin tihziaawmna atan step sira tui luang lut thei turin siam ni se, an ti.