Zaninah inhnek 12 en tur awm leh dawn

Mizoram Labour Link LPS Pro Fight chu a zan lina neih a ni dawn a, zanin dar 8:00 hian LPS Arena Falkland-ah inhnek 12-in a chhunzawm leh nghal dawn.

Zanina inhnek tur zingah Pro Fight-a tawnhriat lo nei tawh an awm dawn a, hei bakah hian ram pawn aṭanga lo kalte inhnek en tur a awm leh dawn a, boruak a ṭhat leh a beiseiawm.

Bout 12 awm turah flyweight an tam leh ber dawn a, inhnek pali a awm dawn. Flyweight-ah hian Lalthanzuala, Zawngin boxer a tel leh dawn a, Mathana hi inelna neih hnuhnung berah pawh khan a lo tel tawh avangin, a khingpui tur Bawngkawn Boxer Tommy tan zuam a chi loh ang.

Hei bakah hian Manipur boxer Lalnunthlanga a inlan dawn a, Lalrinnunga, Champhai nen an inhmachhawn dawn. Manipur leh Mizoram inelna anga a ngaih leh theih dawn avangin mipuiin an ngahven leh dawn.

Flyweight dawtah lightweight an tam ber a, inhnek pathum a awm dawn. Bantam leh welter-ah inhnek pahnih ve ve awm tura ruahman niin, middleweight-ah bout khat a awm bawk ang.

Zanin aṭangin a hmuna en turin ticket Rs 50-a lei a ngai tawh dawn a, LPS Youtube channel-ah member tan a en theih bawk. Member nih man hi Rs 179 chauh a ni.