Goal ruk nen PSG an insiamṭha

Nilaini zan Champions League khelhah champion lai Paris St-Germain chuan Slovan Bratislava chu 6-1 zetin an sawp a, French club tan tun season-a an vawi khat chakna a ni.

Spanish forward Ferran Torres chuan PSG tan hattrick a siam a, Ousmane Dembele-a'n goal hnih a khung bakah Fabian Ruiz-a'n goal khat a thawh ve bawk. Bratislava tan Suleiman Camara-a'n khung ve mah se awmzia a nei thui lo.

Inkhel ṭan aṭangin PSG an chungnung tluan zak a, Luis Enrique-a'n player ṭha ber ber a luhtir nghal avangin an inkhan lo hle. Minute 17-naah Dembele-a'n an hmahruaina goal khung hnuah an hawi kir tawh lo.

French forward hian minute thum hnu lawkah tauh lut lehin an hmahruaina a belhchhah. Barcelona aṭanga an lak thar Torres-a'n minute 31-naaah khung ve lehin, chawlhlawk an hman meuh chuan chak tur a chiang tawh.

Second half an ṭan deuh chiah tihah Torres-a'n a khung belh leh a, World Cup final-a chakna goal khungtu hian minute 57-naah corner aṭanga a ball hmuh chu hattrick siam nan a hmang zui.

Slovak club tan Camara-a'n minute 59-naah goal ṭha zet khungin si phurh a sut ṭhen a, mahse Fabian Ruiz-a'n hun tawp hma deuhin an goal rukna a khung ve leh a, nuamsa takin PSG an chak.

Tun season-ah PSG hian match li an khelhna chiah a ni a, Bratislava hma hian Rennes leh Lille te inhnehtawkpuiin Monaco lakah an tlawm tawh bawk. Hnehna an chan leh bakah an hmatawngten goal an khung leh tak avangin, September 13, Pathianni zana Brest nen an mikhual hunah an inringtawk sawt ang.