Santos-in Coutinho an duh?

Brazilian club Santos chuan midfielder Philipe Coutinho chu lakluh an duh a, an coach Cuca pawhin Liverpool midfielder hlui chuan a zawm duh a nih chuan ṭha taka an lo dawnsawn tur thu a sawi.

Kum 34 mi Coutinho hi free agent ni mekin a duhna lam apiang a hawi thei a, Santos hi amah duhtu langsar ber an ni rih. Coutinho hi ram tana a khelhpui ṭhin Neymar Jr. chuan an club hotute bulah la lut turin a ti nia sawi a awm bawk.

Coutinho hian kumin February khan Vasco da Gama-a a contract neih lai chu inbiakremnain a titawp a, hei hi rilru lama a harsatna enkawl a duh vang niin khawthlang chanchinbute chuan an ziak.

Hemi hnu hian Coutinho hi a la inkhel leh lo a, Santos chuan lakluh an hreh lo nia sawi a tam hle. Santos hian season an hman mekah beisei an pha lo a, Brazilian Serie A-ah 13-naah an awm mek a, relegation zone aṭangin point sarih chauhin an him.

Barcelona leh Paris St-Germain forward hlui Neymar che chhe lo mah se, an team khaichhuah kawnga pui turin Catalan club tan pawha khel ve tawh Coutinho a duh.