Barkley-a'n LeBron James sawisel

American basketball player hlui Charles Barkley chuan, club enkawltu a nih chuan LeBron James chu a lak loh tur thu a sawi a, tun hnaia a team a chetpui dan thlirin a ṭha tawk lo tih a sawi.

Kum 63 mi Barkley chuan, "Mimal takin point score lamah tichhe lo mah se a team a thlensanpui thei meuh lo a, chu chuan team tan a ṭangkai tawk lo tih a lantir. Hei hi thudik a ni.

Philadelphia 76ers coach ni ngat ila chu James hi ka la lo ang. Miin a ṭhatzia an sawi a, player ṭha tak a nih avangin a dik lohna a awm lo. Mahse tun hnaiah a team hi playoff a tlangpui hleithei lo a, ka hriat sual loh chuan season hmasa khan playoff-ah chak nei loin an tla," a ti a, Lebron tan ngaihthlak a nuam lo ang.

Los Angeles Lakers player hlui Byron Scott pawhin thla hmasa khan, Sixers chu Lebron an neih avang ringawta champion tur chiang sa an nih loh thu a lo sawi tawh a, 2000 chhoa Lakers-in Karl Malone, Gary Payton, Kobe Bryant, Shaquille O'Neal leh Derek Fisher te an hlawhchhampui ang kha an ni thei tih a sawi.

Kum 41 mi Lebron hian season hmasa khan Lakers chu, Western Conference second round-ah Oklahoma City Thunder hneh zo loin a tlakpui a, best of seven series-ah vawi khat mah an chak ve lo.

Cleveland Cavaliers forward hlui hian tun nipuiah khan, Lakers-a a contract a zawh tawh avangin a duhna lam apiang a hawi thei a, inkhelh a chawlhsan hmaa nomawi chawi leh tumin Sixers a pan.

Sixers hian player langsar Joel Embiid leh Tyrese Maxey te an nei sa a, Lebron bakah Jaylen Brown an lakluh tel avangin 1983 hnua champion leh thei turin beisei an nei sang hle.

Lebron hi a kum tam ve deuh tawh mah se player ṭha ber zinga mi a la ni reng a, mahse a ṭuan a fum ve deuh tawh avangin a teammate ten an thlawp ṭhat a ngai dawn thung.