Pro Fight zan hnihna boruak a ṭha

Mizoram Labour Link LPS Pro Fight boruak a nung chhunzawm zel a, zan hnihna chu Nilaini zan khan LPS Arena Falkland-ah khelh chhunzawm niin boxer 10 ten inelna an hmachhawn.

Zan hnihnaah hian flyweight-ah inhnek pali awmin an tam ber a, fly dawtah lightweight awmin, inhnek pathum a awm a, bantamweight-ah pahnih leh welterweight-ah pakhat a awm bawk. Bout 12 awm tura ruahmanah inhnek 10 en tur a awm.

Bantam-ah hian Englianthanga, Dawrpui chu a khingpui tur, Siaha boxer Lalhruaitluanga Khawlhring chu a inlan loh avangin walk over hmanga chak zawka puan a ni.

Welter-a intum tur zinga mi Francis Malsawmtluanga, Dinthar leh Lunglei Ramthar boxer Lalawmpuia Chinzah te chu an inlan loh ve ve avangin an inhnek hi 'call off' a ni a, record aṭanga thai bo a ni.

Churachandpur, Manipur aṭanga lo kal Thangboi chu kumin pro fight-ah, Mizoram pawn aṭanga boxer inlan hmasa ber a ni a, hnehna a chang nghal. Lightweight-a inhnekah Thangboi hian Bungkawn Vengthar boxer Lalruatfela a hneh a, mahni rama khel ni lo mah se zam loin round thum a la vek.

Kumin pro fight-a knockout hmasa ber hmuh tur awm bawkin Lalruatfela, Bawngkawn West chuan Ṭhuampui Vengthar boxer Lalpekzuala a knockout. Ruatfela hian a khingpui hnek tlu turin hun a duh rei lo a, minute hnih leh second hnih chauh a mamawh.

Lightweight-a tel Lalrohlua Pautu chu Fighter of the Night-ah thlan niin, Kanan veng boxer hian North Vanlaiphai aṭanga aiawhtu Dominic Lalṭanpuia chu split deicision hmangin a hneh. Rohlua leh Dominic-a inhnek hi zan hnihnaa inhnek hmuhnawm bera chhal ngam a ni.