October 30-ah IFL khel dawn

India rama club football inelna sang ber dawttu, Indian Football League chu October 30-ah khelh ṭan a ni dawn a, Mizoram aṭangin Chanmari FC chu he inelna hmachhawn tur awmchhun an ni.

IFL season tharah hian club 11-in inelna an hmachhawn dawn a, Aizawl FC chuan IFL khel zui theia an inngaih loh avangin an inhnukdawk a, an aiah hian Nagaland United chuan inelna hi an hmachhawn ang.

Nagaland United bakah hian Delhi FC aṭanga license leichhawngtu, Odisha club Samaleswari chuan IFL hi an hmachhawn ve dawn bawk a, I League Second Division champion Bengaluru United leh ISL aṭanga tla Mohammedan SC ten inelna an hmachhawn bawk ang.

Hetihlai hian season hmasa champion Diamond Harbour chu ISL khel turin inpetkai mah se, sum lama an tlakchhiat avangin ISL an khel dawn lo a, IFL pawh an khel dawn chuang lo!

Mizo club Chanmari FC bakah Dempo SC, Gokulam Kerala, Rajasthan United, Real Kashmir, Shillong Lajong leh Sreenidi Deccan te chu season hmasaa IFL khel, tun season-ah pawh inlan chhunzawm tur an ni.

All India Football Federation thuchhuahin a tarlan danin, IFL club aiawh te leh AIFF deputy secretary general M Satyanarayan te chuan September 7, Thawhṭanni khan Prasar Bharati CEO Gaurav Dwivedi an hmu a, season thar IFL hi DD Sports-ah kan en dawn a nih hmel.