Arsenal chhandamtu Captain Fantastic

Season hmasa Champions League final-a chak zo lo Arsenal-in tun season-a an UCL match hmasa berah hnehna an chang nghal a, khualmualah Napoli chu 1-0 in an hneh - goal khungtu chu 'Captain Fantastic' Martin Odegaard a ni a, Gunners tan innghahna tlak a nihzia a pholan chhunzawm zel.

Napoli khelmuala inkhelah Italian club-in chance an nei hmasa zawk a, inkhel ṭantir lamah Alisson leh Kevin de Bruyne ten David Raya an enchhin a, an paltlang thei lo thung.

Hemi hnu hi chu Arsenal ta tiin a sawi theih tawh a, mahse, Gunners hian goal khung an harsat tlat. January hnua a vawi khat nana Arsenal tana bul ṭan Mikel Merino-a'n goal khungna remchang nei mah se, Eberechi Eze-a siamsak chu keeper chauh hmachhawn chungin a tauh goal lo.

Bukayo Saka pawhin hming chher theihna remchang nei mah se, a chhawr lo a, six yard vel aṭangin Piero Hincapié chuan a thlawh over luah bawk! Gunners-in goal khung an harsat a, a tawpah chhanhim turin captain Odegaard a lo ding chhuak.

Gunners player-ten mawi zeta ball an inpek kual hnuah, a hmawr bawk turin Norwegian midfielder a lo awm a, goal kilah tawih zetin chakna goal a khung - Napoli keeper Vanja Milinkovic-Savic tan tih theih a awm lo a, goal ṭha bik a ni. Odegaard hian tun season-ah match nga aṭangin goal li a khung der tawh.

Arsenal goal luhna tur hian Gunners player-ten vawi 29 zet ball an in pass kual a, 2003-04 season hnuah Champions League-a goal khung tura ball an in pass hnem ber dawt a ni - December 2026 khan, Lucas Perez-a'n FC Basel laka goal a khung dawn khan vawi 33 an in pass hman.

Premier League champion Arsenal hian tun season inelna hrang hrangah match nga khel tawhin, an la chak vek a, Inrinni zan dar 12:30 hian league match khel turin Sunderland an lenchilh zui ang.