Liverpool-in Atletico Madrid an hneh

Andoni Iraola-a'n Champions League-a a team a kaihhruai hmasak berah hnehna a chanpui nghal a, Nilaini zan khan Liverpool chuan 2-1 in Atletico Madrid an hneh - bul ṭan dan duhawm a ni.

Atletico hian Marcos Llorente hmangin goal hmahruai an khung a, Anfield thawm a reh hle. Mahse, Reds tan Dominik Szoboszlai leh Alexis Mac Allister ten goal khat ve ve an khung a, hun tawp thlenga goal dang lut tawh loin, 2-1 in Liverpool an chak.

Reds hian match hnih a zawnin hnehna an chang ve ta a, chhunzawm zel an duh dawn - Inrinni zan dar 7:30-ah Premier League match an khelh chhunzawm dawn a, Anfield-ah Fulham an mikhual ang.

A tirah Atletico

Inkhel ṭantirah team pahnih an innawr tawn zak zak a, Alexander Isak leh Bradley Barcola ten hma takah chance nei mah se, an chhawr lo a, Alex Baena-a'n a hun ṭha neih a chhawr thei bik lo bawk.

Mahse, minute 17-naah Liverpool laka goal khung nuam ti em em mai Marcos Llorente a inlar a, Spanish fullback hian Reds laka a goal nga khungna ni turin Julian Alvarez-a siamsak chu goal-ah a chantir.

Alvarez-a ball pek a ṭha thlawt a, Llorente finishing a ṭha tel bawk. Hetihrual hian Milos Kerkez chu dem theih a ni a, Hungarian fullback hian Llorente a veng hneh tawk lo a, Anfield-ah Liverpool-in goal an chhuah hmasa.

A na asin

Atletico tana goal khungtu Llorente hian Champions League-ah goal 10 a khung tawh a, heng zinga goal nga hi Anfield-a a khung a ni! Anfield-a goal a khung theih em avangin a ui hmingah pawh 'Anfield' tih a vuah.

Reds fans tan an ngam loh ṭhin bawk ngam loh nawn a na hle ang tih a chiang. Llorente goal khung hnuah Reds-in an nawr dawn emaw tih laiin, Atletico bawkin chance an nei nawn a, mahse, Alvarez shot chu Alisson-a'n ṭha zetin a dang.

Liverpool an harh zawk - na takin Atletico an nawr let a, Szoboszlai-a'n si phurh sutna goal a khung. Kerkez-a'n Atletico ball ken lai chhuhsakin, ṭha taka a tlanpui hnuah Barcola a siamsak. French forward pet hi dan per a nih hnuah Ronald Araujo chuan mawi zetin Szoboszlai tan a 'back heel' a, Hungarian midfielder hian goal-ah a chantir.

A hming Macca

Second half ṭan aṭanga rei lotêah Liverpool-in Atletico an nawr let thut a, Barcola-a'n goal khungna chance duhawm a nei. Mahse, French forward hian uiawm takin a hlah - pound maktaduai 123 man a ni tih a awihawm lo lek lek mai!

Mahse, a hnu lawkah Reds tan Mac Allister a inlar a, Atletico tlarhnung buai nuai karah ṭha zetin a thlawh lut - Jan Oblak tan tih theih a awm lo a, Argentine midfielder goal khung a ṭha thlawt.

Mac Allister hian Atletico nena an inkhelh hma lawkin, club-in contract thar an zawrh lo chu hrehawm a tih thu a sawi a, Liverpool thuneitute tan Mac Allister-a dawhkana contract thar chhawp a hun e!

Barcola a ṭha

Liverpool tan Barcola-a'n a vawi khat nan inkhel bul a ṭan a, mahse, hliam vangin lakchhuah a ngai. Iraola chuan a player chu ngaihtuahawm a nih loh thu a sawi a, hliam tenau mai a nih thu a sawi.

Spanish coach chuan, "Paris St-Germain tan pre-season a nei miah lo a, engtianga rei nge a khelh theih ang tihah hian ka chiang bik lo. League-ah khan minute 30 a khel a, a dinhmun kan hre chiang ta. A khelh danah ka lawm a, goal khung lo mah se, chance duhawm tak vawi hnih a nei," a ti.

Hetihlai hian Liverpool tana season duhawm tak hmangtu Cody Gakpo chu squad-ah a tel lo a, a tihrawlah hliam tenau a nei. Iraola chuan, "Fulham hmachhawn tura a chance hi 50-50 a ni," a ti a, a serious loh thu a sawi.