US Open hmeichhe singles-ah dream semifinal

US Open hmeichhe singles-ah seeded no. 1-4 ten semifinal an luh vek avangin dream semifinal tiin a chhal ngam. Seeded no. 1 Aryna Sabalenka leh seeded no. 3 Jessica Pegula ten semifinal an luh hnuin seeded no. 2 Elena Rybakina leh seeded no. 4 Coco Gauff ten Nilaini zan khan semifinal an lut.

Final khel tur zawnna hi tukin zingah neih a ni dawn a, zing dar 4:30-ah Aryna Sabalenka leh Jessica Pegula te an inkhel ang a, hemi zawh hian khawtual nula Coco Gauff leh world no. 1 thar Elena Rybakina te an inkhel zui ang.

French Open champion Mirra Andreeva-i'n quarterfinal-ah bul a ṭan ṭha nghal a, minute 26 chhungin Coco Gauff lakah set hmasa ber 6-2 in a la nghal. Set hnihnaah pawh Russian nula Andreeva a che ṭha a, match point vawi hnih a nei hman.

Mahse, seeded no. 4 Gauff-i'n tie break hmangin set hnihna a la hram. Set thumnaah erawh Gauff hi a chungnung zui a; 2-6, 7-6 (9-7), 6-2 in hnehna a chang. American tennis star Gauff chuan, "First set a zawh kha chuan French Open-a a chet ṭhat zia leh quarterfinal lut tur a tho chhuah leh dan te kha rilruah a awm. Mahse, mipui hmaah chuan che ṭhat kan duh a, court kha inchhirna tel miah loa chhuahsan ka duh. Mipui tih hnual kha ka hlau lo a, theihtawp ka chhuah tih hria se ka duh," tiin a lehthal leh dan chungchang a sawi.

Tun ṭum hi Wimbledon 2009 hnua seeded sang paliin semifinal an luh lehna hmasa ber a ni a, kumin US Open hmeichhe singles hlutna belhchhahtu a ni thei ang.