Boruak sangah Zverev a ṭha

US Open-ah seeded no. 1 Alexander Zverev-a'n inelna ṭantirh lamah beisei pha lo mah se, stage sang chinah erawh champion tura rinkai ber a nih chhan a pholang. Nimin chawhma khan Zverev hian seeded no. 21 Luciano Darderi chu 6-2, 6-2, 7-6 (7-3) in an hneh.

Tun ṭum inelnaah hian seeded sang pali aṭangin seeded no. 1 Zverev leh seeded no. 2 Carlos Alcaraz te chauhin quarterfinal an lut a, German star tan final kalkawng a inhawng zau hle. Zverev hian Botic van de Zandschulp nen quarterfinal-ah an inhmachhawn dawn.

Kum 30 mi Van de Zandschulp hian kum 2021 khan US Open-ah quarterfinal a lo thleng tawh a, tun ṭuma a thiam pariat zinga invawkai tur hian a thawkrim hle. Round of 16-ah Dutch tennis player hian Arthur Gea a hmachhawn a, set hmasa pahnih hloh mah se 3-6, 6-7 (0-7), 7-6 (9-7), 7-6 (7-3), 6-4 in a hneh let.

Van de Zandschulp hian chak turin darkar nga leh minute 13 a mamawh a, US Open chanchina match khelh rei lama palina a ni. Quarterfinal-ah Van de Zandschulp hian Zverev a hmachhawn dawn avangin hmabak a harsa dawn hle.

Inkhel dangah Karen Khachanov leh seeded no. 28 Alexander Blockx ten hnehna an chang a, quarterfinal-ah an inhmachhawn ang.