Police hmaa ding tur MLS

Star Cement MPL13 ṭan hmain Mizoram Police-in thawm nei lian lo mah se khelmualah Police zia an rawn chhuah a, Aizawl FC leh Chanmari FC elpha thei tur berah an ngaih theih. Mahse, Police hi tun hma angin an khel a la nghet tawk lo a, vawiin tlai dar 2:30-a Lawngtlai club MLS an hmachhawn hunah an dinhmun a hriat ang.

Mizoram Police tan Malsawmfela a la ropui reng a, Ramhlun South striker hian goal thum khung tawhin goal ropui vek a ni. Sawmfela a hmuhnawm a, chutihrihrualin MPL5 best player Malsawmfela chet ṭhat theih nan player naupang zawkte an pawimawh hle.

Tun ṭum inelnaah Republic Vengthlang tlangval B. Rosangliana a che ṭha a, ani bakah hian defender Vanlalpeka Pautu, midfielder pahnih C. Zodinmawia leh Lalbiaktluanga te an pawimawh viau bawk. Chutihrualin Police tlarhnung a phui tawk ṭhin lo a, result ṭha an neih theih nan goalkeeper F. Lalmuanawma a pawimawh takzet.

MLS lamin beisei ang result an nei lo a, season zawna semifinal lut turin Police an hneh a pawimawh dawn. Match hnihnung berah Kanan FC 3-0 in an hneh a, hemi ṭuma che ṭha Felix Lalruatsanga leh Lalfamkima (FK-a) te bawk hi enbik tur an ni.

Lawngtlai club enkawltu F. Lalrozama'n tualchhung football a hrechiang a, Police dinhmun dik tak pawh a hre dawn. Table aṭanga thlirin Police chungnung mah se player neih dan aṭanga thlirin team pahnih hi an inang tawk a, hei vang tak hian Rozama game plan a pawimawh ang.