Manipur hneh loin Mizoram an tla

Junior Boys’ National Football Championship for Dr. B.C. Roy Trophy 2026-27-ah Mizoram khingpui hneh vekin group stage paltlang mah se semifinal-ah Manipur lakah an vanduai. Bengaluru Football Stadium-ah Mizoram leh Manipur hun pangngaiah 2-2 in an inhnehtawk a, penalty shootout-ah Manipur 7-6 in an vannei ta zawk.

Nimin chawhma inkhelah Manipur-in bul an ṭan ṭha zawk a, minute 14-na lekah Siroi Khwairakpam-a'n hnai tak aṭangin a volley lut. Mizoram defender-te an muthlu a, goalkeeper tan dah ngaihna a awm lo. Manipur coach Konjengbam Donald Singh-a'n Mizoram khelh dan a zir ṭha tih a chiang a, ṭum danga coach Lalrindika Khiangte hote ṭhatna lai a dang chat ṭha hle.

Mahse, Mizoram tan minute 27-naah Victor Lalawmpuia'n mawi zetin freekick a pet lut a, 1-1 a nih tak avangin inkhel a nung thar hle. Manipur lamin thahrui an ngah hret a, Mizoram defender fimkhur tawk loh vangin first half-ah hma an hruai nawn. Heikrujam Jogesh-a'n ṭha takin a lalut a, goal ṭha bik a khung.

Goal mamawh Mizoramin second half an thunun a, ball an chang tam zawk a, goal chance pawh an insiam nual. Mahse, coach Dika hote hian goal an khung mai thei lo. Hun tawp hma hretin Mizoram an vannei a, penalty hmuin C. Lalhmingropuia'n cool takin a khung.

Extra time a awm lo a, penalty shootout hmangin chak zawk zawn a ni. Manipur lamin pet goal lo hmasa mah se Mizoram lamin an hun ṭha an hmang ṭangkai thei lo a, mi pariat zetin penalty an pet hnuah Manipur 7-6 in an vannei ta zawk. Manipur hian September 9, Nilaini chawhma dar 10 hian West Bengal nen final an khel ang.

Mizoram manager Lalbiakzuala chuan, "Kan naute an khel ṭha, an huaisen a, U-15 level game-ah chuan an khel a hmuhnawm phain ka hria. Kan players tam zâwk hian hmalam hun êng tak an nei ngei turah ka ngai. Kan vanduai zawk a, inkhel entute pawhin an chiang ang. Bengaluru Mizoten khuang nen kan inkhel min rawn ṭawiawm ṭhin a, min tiphurin, kan chakna hmanraw pawimawh tak an ni, an beisei kan tih hlawhtling thei lo erawh pawi kan ti. Kan team tana Mizoram chhung leh pawna ṭawngṭaitute zawng zawng chungah kan lawm hle," tiin Vanglaini a hrilh.