Thailand-ah Emmanuel-a khel dawn

Mizo basketball player Emmanuel Vanlalawmpuia chu player transfer chungchanga agent te nen inbiaiin, Thailand-a khel turin inremna an nei a, MBBA Favang Tournament khelh zawh hnuah ram pawna inkhel turin a chhuak dawn.

Nursery Veng tlangval Emmanuel chuan, "Indian agent ten ka manager kaltlangin min rawn bia a, ram pawna inkhelh ka lo ngaihtuah lai tak a nih bawk avangin kan tan hun ṭha a inherchhuak," tiin Vanglaini a hrilh.

Thailand lamah season chawlh an hman lai a ni a, kumin MBBA Favang Tournament zawh hian tournament a tam dawn thung. Emmanuel-a hi October-ah a kal lo a nih pawhin, November emaw December-ah koh reng theih a nih thu Vanglaini a hrilh bawk.

Kum 21 mi Emmanuel-a hi Thailand-ah 3x3 tournament a khel dawn a, a khel ṭhaa indawrna a kal tluang a nih chuan nakkumah game pangngai khel turin Qatar leh Bahrain-a khelh theihna chance a nei leh dawn

Khatla TBL player hi Mizo basketballer ṭhangduang per bawl a ni a, Mizoram Super League-ah TBL hi 2023 leh kumin khan a lo champion pui tawh a, player pawimawh ber zinga mi a ni.