Saikhamakawn fiahna tur Mizoram Police

Star Cement MPL13-ah Saikhamakawnin Durtlang Football Stadium-a MPL inkhel hmasa berah Dinthar FC 3-0 in an sawp. SKK an phur thar a, vawiin tlai dar 2:30 hian Mizoram Police an hmachhawn dawn. Inkhel hi Zonet Zawlbuk leh YouTube channel aṭangin a en theih ang.

Coach Lalrindika Hmar kaihhruai Saikhamakawnin match hmasa pahnihah Aizawl FC leh Ramthar Veng FC te an hneh lo a, season bul ṭan chhe viau mah se Dinthar FC 3-0 a an sawp avangin a phur thar hle.

Dinthar an sawp ṭum hian SKK tan K. Lalremmuana'n hattrick a siam a, team angin an khel ṭha bawk. Captain Vanlalmal-sawmdawngkima'n midfield aṭanga a ball vawrhluh a ṭha ṭhin a, Kiran Chhetri leh Remmuana te nen mual laiah an inkawm rem hle.

Chuithrualin tun dinhmunaah Mizoram Police hi team ṭha zawk an ni a, MPL13-ah chak loh la nei loin table-ah palinaah an awm mek. Kuminah Police-in player tawnhriat ngah zawk thlawp turin kum naupang zawk player ṭhahnem tak an lalut a, an ṭhatpui hle.

Midfield-ah C. Zodinmawia (Didina) leh B. Rosangliana te an rintlak viau a, nikum lam pawha Police team tana khel tawh Lalbiaktluanga pawh team tan tha a thawh hlawk hle. Tlarhnungah Police-in Bethlehem Vengthlang tlangval Vanlalpeka Pautu an lalut a, hmun pawimawh a chang nghal.

Kum naupang zawk player awm mah se goal khungtute erawh kum upa lama upa zawkte an ni leh ṭhin a, Ramthar Veng nen 3-3 an inhnehtawk ṭumin Malsawmfela'n goal ropui a khung a, captain Lalbiakhlua'n bench aṭanga lutin goal a la khung bawk. SKK lakah tawnhriat nei player-te hi an pawimawh dawn a, Police hian an elpui team hi an hneh lo a nih chuan palina aṭangin an chhuak dawn.