MBA hruaitu pawimawh Mama a thi

Mizoram Badminton Association (MBA) senior vice president leh Badminton Association of India (BAI) a executive member ni bawk, H. Lalnunsiama (Mama) chu September 2, Nilaini khan a thi a, nimin khan Saron Presbyterian Kohhran Jubilee Hall-ah vuiliam a ni.

Saron Veng, Aizawl pa H. Lalnunsiama hian MBA-ah nihna pawimawh tak tak lo chelh tawh ṭhinin, Senior Vice President, Vice President leh Honorary Secretary te a lo ni tawh a, BAI-ah Executive Committee Member, Promotional Sub-committee Member leh BAI Coaching and Development Sub-committee Member te a lo ni tawh bawk.

Player a nih lai pawha Mizoram tana vawi duai lo lo feh chhuak tawh Mama hian Yonex Dutch Open, Dannish Denmark Open leh French Open 2017-ah te India Manager niin, India team a lo kaihruai tawh a, Tata Trusts, NEIDA, MSSC leh MBA-te thawhhona, Mizoram Badminton Initiative bul ṭantute zinga mi niin, Tata Trusts leh NEIDA-te thawhhonaah Chairman ni lai a ni.

MBA chuan, "Mizoram badminton-in hma a sawn theih nana nasa taka hma latu leh tha thawh hnem berte zing ami a ni a, Mizoram badminton arsi lian leh hruaitu hlunin hun lo taka chatuan ram min pansan hi hriatthiam har kan ti takzet," an ti a, a kalsan tak a nupui leh fanaute tan Pathian thlamuanna an dilpui thu an tarlang bawk.