Roma tan Malen a vul zel

Donyell Malen chuan goal khung a bansan thei rih lo a, Thawhṭanni zan Serie A inkhelah AS Roma chu khualmualah 4-0 a chakpuiin Lecce lakah goal hnih a khung a, Matias Soule leh Rodrigo Mora ten goal khat ve ve an khung bawk.

Inkhel ṭan aṭanga minute lina lekah kum 27 mi Malen-a'n an hmahruaina goal a khung a, Roma an hawi kir tawh lo. Dutch forward hian minute 23-naah a goal hnihna a khung leh a, minute hnih hnu lawkah Soule-a'n khung ve lehin first half-ah chak tur a chiang der tawh. Minute 65-naah Mora-a'n khung belh lehin nuamsa takin Roma an chak.

Malen-a'n season bul a ṭan ṭha takzet a, August 24, Thawhṭanni zana Fiorentina nen an inhmachhawn ṭumin hattrick a siam tawh a, match hnih a khelh aṭangin goal nga a khung tling der tawh.

Borussia Dortmund forward hlui hian kumin January khan Roma hi loan-in a zawm a, season chawhnu lamah match 18 chauh khel hman mah se goal 14 a khung hman a, Inter Milan forward Lautaro Martinez chiah a tluk lo.

A khelh ṭhat avangin Magic One-in (Roma sawina) euro maktaduai 27 sengin an la nghet zui a, an tifuh rih hle. Malen bakah nipui laia an lak thar Mora akhel ṭha bawk a, Portuguese forward hi kum 19 mi chauh a la nih a, en bik a sual dawn lo.

Roma player lak thar zingah Daniele Ghilardi-a'n bul a ṭan a, Santiago Castro, Marten de Roon leh Nahuel Molina te bench aṭangin an lut bawk. Anni bakah hian Saudi Pro League hnawla Roma thlangtu Paolo Dybala a khel tluan bawk.

Inkhel dangah Atalanta leh Bologna te an inhmachhawn bawk a, hun pek belha Lazar Samardzic-a goal hmangin Atalanta-in 1-0 in hnehna an chang.