Juventus-in Woltemade hawh dawn

Italian club lian Juventus chuan Newcastle United aṭangin Nick Woltemade chu loan-in an la dawn a, Juve leh Magpies inremnaah Woltemade hi Italian club-in a ngheta lei theihna an nei ve dawn lo thung.

Turin club hi Manchester United forward Joshua Zirkzee nen pawh sawi zawm ni mah se, German forward hawh man a tlawm zawk avangin Dutch forward hawisanin Newcastle forward lam an hawi.

Hetihlai hian Juve chuan an forward Jonathan David chu tun season chhung atan loan-in Atletico madrid-ah an kaltir ve thung a, Madrid khaw club hian a hlawh chanve an tum dawn a bakah, season tawpah an duh chuan euro maktaduai 25 sengin an la nghet thei bawk ang.

Kum 26 mi David hian nikum July khan Juve hi a zawm a, 2030 thleng contract la nei a, kum khatah euro maktduai ruk a hlawh. Season liam ta khana che ṭha tawk lo a, inelna hrang hrangah match 35 khelin goal ruk leh assist pali a nei.

World Cup khelh zawh takah khan a hming chherin Canada chu round of 16 a kaipui a, Qatar lakah hattrick siamin inelna hmang chhe lo mah se Turin club-in an duh khawp lo. Atletico an lo lang a, David hmin turin hun an duh rei lo.

Canadian forward-in Atletico a zawm ruala zawhna lo awm chu Julian Alvarez-a dinhmun a ni a, Diego Simeone-a'n David hi Argentine forward thlakna tura a la anga ngaitu an tam.

Kum 26 mi Alvarez hian ngaihventu a la nei ve reng a, Mikel Arteta enkawl Arsenal chuan thawm an nei lian ber a, Alvarez duh vetu Barcelona-ah Gabriel Jesus an kaltir tawh avangin beisei an la nei a, mahse thu chiang engmah a awm lo thung.