Balogun manah Everton leh Monaco inrem

Everton chuan Monaco forward Folarin Balogun la lut turin pound maktaduai 40-in inremna an siampui a, American forward hian Hill Dickson Stadium-ah a football zinkawng a zawh chhunzawm dawn.

Toffees hian hian transfer tawp hmain an tlarhma tihchakna tur lak belh an duh a, Balogun bakah Tottenham striker Richarlison te chu lak an tum zinga hming langsar an ni.

Brazil forward Richarlison hi Everton tan pawh a lo khel tawh a, 2022 khan Spurs a zawm. Kum 29 mi forward hian Everton-a kir leh a duh lo nia sawi a awm a, chuvangin Balogun-a lam an hawi

Kum 25 mi Balogun hian Monaco tan inelna hrang hrang match 91 a inlanah goal 31 a thun tawh a, USA tan vawikhat pawh match 31 khel tawhin goal 12 a khung tawh bawk.

Arsenal tan pawha lo khel tawh Balogun hi kumin World Cup-ah khan mipui ngaihven a ni a, ngaihven a nih chhan erawh a inkhelh boruak ai mahin a hremna an sut vang a ni.

Last 32-a USA leh Bosnia-Herzegovina an inhmachhawn ṭumin Balogun hian red card a hmu a, round of 16-ah Belgium hmachhawn thei lo tura ngaih a ni. Mahse Donald Trump leh FIFA president Gianni Infantino te a inbiak hnuah a red card hi an suspend sak a, Belgium lakah khelin an chak zo lo thung.

Balogun hian World Cup-ah khan match li khelin goal thum a khung a, ram tan innghahna a ni phâk. Gunners bakah Middlesborough tan a lo khel tawh a, age level-ah England tan a lo inlan tawh bawk avangin English football-ah a mikhual lo ang.