McLaren-ah Norris a nghet

Lando Norris chuan McLaren-a awm zel tura inremna thar a ziah chu, a tan pawm mai chu thil awlsam a nih thu leh a inngaihtuah buai loh thu a sawi.

F1 champion lai hian Inrinni khan contract thar a ziak, 2030 kum tawp thleng McLaren-ah a châm chhunzawm dawn. A contract hi a hmang zo a nih chuan McLaren-ah kum 10 a awm tling dawn tihna a ni.

Kum 26 mi Norris chuan, "Team dang aṭangin sawmna ka dawng ve a, mahse team dang zawma midang nena inelna hmachhawn ka duh lo a, khawiah mah ka kal dawn lo. Chuvangin he thutlukna hi F1 ka luhchilh hnua awlsam ber a ni," a ti.

British driver hi contract thar a ziah lawk loh avangin chhuak tur anga sawi thawm a awm hman a, mahse Norris chuan a contract hlui zawkah pawh kum khat chuang a la neih avangin a hmanhmawh loh thu a sawi

McLaren tan a rinawm chhan chu an CEO Zak Brown leh team principal Andrea Stella te nen inlaichinna ṭha tak an neih vang a nih thu Norris-a'n a sawi a, anni ang chu hmun dangah hmuh a inbeisei loh thu a sawi bawk.

F1 season kal mekah Norris hi drivers table-ah palina a ni mek a, Mercedes driver pahnih Andrea Kimi Antonelli leh George Russell te bakah Ferrari driver Lewis Hamilton te a tluk lo. Constructors table-ah erawh McLaren hi pathumnaah awmin Mercedes leh Ferrari te bawk an tluk lo.

Norris hian season bul a ṭan ṭha tawk lo a, mahse insiamrem chhoin podium vawi li a lawn tawh a, vawi hnih hnehna a chang tawh bawk. Inelna hnuhnung pahnih Hungarian leh Dutch Grand Prix-ah a zawna hnehna a chan avangin a inrintawk lai tak a ni.

September 6, Pathianni zan dar 6:30-ah Italian GP a awm leh dawn a, Norris hian a zawna vawi thum chak ngei a duh ang. Hetihlai hian table-a hmahruaitu Kimi Antonelli te rama intlansiak tur an nih avangin a theihtawp a chhuah a ngai dawn.