Raptors-in Lowry jersey retire dawn

Toronto Raptors chuan an player hlui Kyle Lowry-a hak ṭhin no. 7 chu, nakkum January 10-a Raptors-in Philadelphia 76ers an mikhual hunah chawimawina lantirin midang hak theih tawh loh turin an siam dawn tih an puang.

Kum 40 mi Lowry hian Raptors chanchina a vawi khatna atan 2019 khan Golden State Warriors hnehnin NBA-ah a champion pui a, 'Greatest Raptor of All Time' (GROAT) tia hming lem pek a ni nghe nghe.

American point guard hlui chuan, "He hun hi kum tam tak ka lo suangtuah tawh ṭhin a ni a, Toronto hi ka in angin ka ngai reng ṭhin. Scotiabank Arena (Raptors stadium) ngeiah ka hak ṭhin jersey no. 7 an khai sang tur hi ka tan a hlu dawn takzet.

Club chhungkuate nen hriat reng tawh tur thil duhawm tak kan din ho a, anni bakah ka chhungte nen lan awm lai ngeia hetiang hun lawmawm kan tawng tur hi vannei ka inti hle a ni," a ti

Raptors chanchinah Lowry hi a jersey an retire tur pahnihna chiah a ni a, November 2024 khan Vince Carter-a jersey no.15 chu midang hak theih loh turin an lo retire tawh.

Lowry hian 2006 khan Memphis Grizzlies-in draft-ah an thlang a, 2009 thleng Grizzlies tan a khel. Grizzlies hnuah Houston Rockets zawmin kum thum chhung a khel hman.

Rockets a chhuahsan hnuah 2012 khan Raptors-ah a kal leh a, Raptors tan a vanglai hmang zoin kum kaw chhung a khelhsak. 2021 khan Miami Heat a zawm leh a, Heat-ah kum thum a khelh hnuin 2024 khan Sixers a zawm leh a, kum hnih khelhsak hmanin nikum June khan inkhelh a chawlhsan.

A inkhelh laiin Lowry hi NBA All Star-ah vawi ruk thlan a ni a, 2016 khan Rio de Janeiro-a Olympic neihah USA-in gold medal an lak ṭum khan tel vein player pawimawh a ni phâk.