Wawrinka-a'n US Open a mangṭha

Grand Slam-a vawi thum champion tawh Stan Wawrinka chuan nimin zing khan Matteo Berrettini lakah 6-7 (4-7), 6-7 (3-7), 0-6 in a chak lo a, first round-ah a tla nghal. Kum 41 mi Wawrinka hian season tawpah tennis khelh a chawlhsan tawh dawn avangin US Open a khelh tawpna ber tur a ni.

Kum 2016 khan Wawrinka hi US Open-ah a champion a, Berrettini lakah chak lo mah se mipui thinlung a hneh. Entu mipui 8000-in ding chungin zahna an lantir a, Swiss tennis star hian a ngaihlu tih lantirin a kut chu a awmah a dah ve bawk.

Wawrinka chuan, "Hetiang hun duhawm bik tawn ka duh avang hian kum 41 thleng ka khelhna chhan hi a ni. Wild card min pek avangin ka lawm hle. Kum 10 liam ta khan helai hmunah nomawi ka lo chawi tawh a, min ṭawiawmna zawng zawng avangin inchungah ka lawm," tiin a sawi.

Swiss star Wawrinka hi Roger Federer, Rafael Nadal leh Novak Djokovic te vanglaia Grand Slam vawi thum chawi thei a nih avangin player ṭha bik a ni tih a chiang hle.