SKK tana thlamuanna thlentu Remmuana

Saikhamakawnin Star Cement MPL13 match hmasa pahniha an khingpuite an hneh loh hnuah chak hmel an hmu ta a, nimin khan K. Lalremmuana hattrick hmangin Dinthar FC 3-0 in an sawp. Coach Lalrindika Hmar hoten point thum hlu tak an hlawh chhuak a, ban hial duhna rilru paihin champion duhna rilru an pu chho leh thei tawh ang.

Durtlang Football Stadium-a inkhel hmasa berah first half-ah goal a lut lo. Chutihrualin goal chance erawh a tam a, Dinthar forward Silvana R. Lalruatkima'n freekick aṭangin crossbar a pet per. SKK captain Vanlalmal-sawmdawngkima pawhin freekick ṭha zetin a pet mah se keeper Zosangliana'n a dang a, forward Rorelliana pawhin chance ṭha bik a hlah.

Second half-ah Champhai tlangval Remmuana a inlar ṭan a, Dinthar tlarhnung tih ṭhat tawk loh chu minute 48-naah cool takin a khung. SKK an phur chho a, minute 51-naah Remmuana hmang bawkin an khung lehnghal a, Dinthar tlarhnung an ṭhiat mawi hle.

Minute 68-naah Remmuana'n hattrick a siam der a, mawi zetin Dinthar keeper Zosanga a pet khum. Maimawms tlarhnung a pherh a, SKK tlarhma an hriam ve bawk. VL Thanga telna SKK-in chance dang nei mah se an khung belh lo a, 3-0 in inkhel a tawp.

SKK hian point thum an hmu a, an goal difference -3 la ni mah se anmahni ang bawka point thum hmu Dinthar FC an hneh avagnin pangnanaah an invawrhchho. Dinthar erawh paruknaah an tla thla thung.