Alcaraz a nung ṭha nghal

US Open champion lai Carlos Alcaraz-a'n hliam vanga ni 139 a chawlh hnuah Thawhṭanni khan a inlan a, Arthur Ashe Stadium-ah Russian player Roman Safiullin chu 6-4, 6-4, 6-4 in a hneh. Tun ṭum inelnaah hian Alcaraz hi seeded no. 2 a ni a, seeded no. 1 Alexander Zverev chu a elpui ber tur a ni. Zverev hian tukin zing dar 5:40 hian Italian player Lorenzo Sonego a hmachhawn ang.

Alcaraz hian a elpui Alexander Zverev leh Jannik Sinner ten French Open leh Wimbledon nomawi an chawi laiin ban rek hliam vangin mual sir aṭangin a en. Tunah erawh court-ah a rawn inlan leh tawh a, inkhelh châkin a tuihal tih a pholang bawk.

Spanish player Alcaraz chuan, "Entu mipui ka ngai a, inkhel boruak ṭang ṭha tak leh inelna chhevel zawng zawng avangin ka lung a leng hle. Tunah erawh ka dam tawh a, ka inlan leh theih tawh avangin ka lawm hle a ni," tiin a sawi.

Alcaraz hian second round-ah vawiin hian Jaime Faria a hmachhawn lehnghal dawn. US Open-ah hian seeded no. 10 chin aṭangin no. 4 Novak Djokovic leh no. 10 Arthur Fils te an tla tawh. Nimin zing khan seeded no. 3 Félix Auger-Aliassime chuan RinkyHijikata chu 7-5, 4-6, 6-3, 7-5 in a hneh a, seeded no. 8 American player Ben Shelton pawhin Tallon Griekspoor chu 1-6, 6-1, 7-6 (7-3), 6-2 in an hneh ve bawk.