Chawhnu dar 2:30-ah I Day Footbal final rematch

Star Cement MPL13-ah vawiin chawhnu dar 2:30 hian Aizawl FC leh Kanan FC te an inkhel dawn. Kumin I Day Football final-ah khan club pahnih hi an inhmachhawn tawh a, hun pangngaiah an inhnehtawk a, tun ṭumah pawh coach R. Lalruatfela hote hi chesual ve thei an ni.

Inkhelhna hmun hi RG Stadium ni loin Durtlang Football Stadium a ni dawn a, Aizawl FC-in I Day Football final-a an chhawr theih loh Zomuansanga an hman theih tawh dawn avangin Kanan tlarhnung tihphui a ṭul ang. Khawbel tlangval hian MPL13-ah goal li a khung leh der tawh a, I Day Football-ah final khel lo chungin top scorer a nih bawk avangin Kanan tan mangchhia thlentu a ni thei ang.

Kanan hian I Day Football final-ah khan Zomuana tel lohna Aizawl FC kha minute 90 chhung an chelh thei a, player ṭha bik Freddy Lallawmawma an kawl bawk. Tunah erawh Freddy-a a awm tawh lo a, Chanmari laka 5-1 a an chak loh hnuin Dinthar lakah 3-1 in an chak lo leh tawh.

C. Zothantluanga (Apuia) leh a kaihhruai Kanan team tan an khelh tawhna thlirin risk lak chi a ni tawh lo a, relegation battle a inṭan der tawh. Kanan tan Aizawl FC laka game mawi khelh aiin point khat hlawhchhuah a pawimawh zawk ang.